Apustu plaza bilakatuko dute Jauregi jatetxeko zelaia, berriro, datorren hilabetean. Urriaren 13rako jarri dute zita, Jon Larrañaga Larra hernaniarrak eta Jokin Urretabizkaia Basozabal donostiarrak, aizkol-sega desafioa jokatzeko.
Eguerdiko 12:00etan hasita, zortzina kanaerdiko moztu beharko dituzte aurrena; eta segan 800 metro karratu belar moztu, ondoren. Bi lanak egiteko denbora gutxien behar duen kirolaria nagusituko da, eta berarentzat izango da jokatutako diru kopurua: 3.000 euro jarriko ditu jokoan, bakoitzak.
Pago berdeko enborrak, eta 200 metro karratuko lau belar sail
Apustuan moztu beharreko enborrak, Basozabalek aurkeztuko ditu. Pago berdekoak izango dira, azal eta guzti, gutxienez 0,9 metroko luzera dutenak eta bistan adarrik gabekoak.
Aizkora lanerako, bi laguntzaile izango ditu partehartzaile bakoitzak, eta horietako batek, makilarekin markatu dezake, baina ezpala kendu gabe.
Zortzi enborrak moztean, eta sega lanean hasteko momentuan, laguntzaileetako bat ordezkatu ahal izango dute, hirugarren batekin. Horrela, laguntzaile ariko da bat, eta zorroztaile beste bat. Pikatzaile bana ere eraman dezakete, segak kaltetu edo izorratuz gero konpontzeko; eta lau eskuarezale ere eraman beharko dituzte, moztutako belarra biltzeko. Hiru sega erabili ahal izango ditu, bakoitzak.
Segarekin, 200 metro karratuko launa belar sail moztu beharko dituzte, nahi duten moduan, kontra mailan izan ezik. Gainera, hasitako maila bukatu egin beharko dute, hurrengoarekin hasi aurretik. Mozketaren txukuntasuna ere baloratuko da, eta behar bezain txukun moztu ezean, denbora penalizazioak jasoko dituzte. Lan horretan ariko dira, Gipuzkoako Herri Kirol Federazioko epaileak.
Bi kirolariek dute apustua atzeratzeko aukera, astebete gehienez, gaixotasunagatik bada eta medikuaren ziurtagiria aurkeztuta. Atzeratutako egun bakoitzeko, hori bai, 60 euro eman beharko dizkio beste kirolariari. Probaren ondoren, berriz, doping kontrola pasa beharko dute biek, eta norbaitek positibo ematekotan, bestea izango da garaile. Biek emanez gero, berriz, ez da irabazlerik izango.
Sarreran bildutako dirua, berriz, erdibana banatuko dute, gastuak kenduta.
Roxario Pikabeak irabazitakoa, Jauregiko azkeneko apustua
Joan den urtean jokatu zen azkeneko apustua, Jauregi jatetxean. Orduan, Roxario Pikabea ereñotzuarra eta Jon Arizmendi andoaindarra aritu ziren lehian, aizkoran eta korrika. Eta nabarmen nagusitu zen ereñotzuarra: atzetik hasi arren, buelta eman eta minutu bat gutxiago behar izan zuen sei enborrak mozteko; eta hortik aurrera, erraz aritu zen korrika, zazpi kilometroak osatzeko. Azkenean, sei minutuko aldearekin nagusitu zen.