Bretainian, Ronde des Valleés (Frantzia) lasterketan izan da pasa den asteburuan errepideko txirrindularitzako Gipuzkoako Selekzioa, eta bertan izan dira Telmo Semperena astigartarra eta Ibai Rodriguez hernaniarra, Alexander Fernandez, Mikel Orbea, Asier Pozo eta Alex Diazekin taldea osatzen.
Hiru etapako lasterketa honetan, emaitza onenak astigartarrak lortu ditu. Sailkapen orokorrean 28garrena izan da, irabazlearengandik, Jared Scot ipar-amerikarrarengandik 1,42ra. Gainera, mendikoan laugarren izan da. Aurreneko egunean 7 segundu galduta, eta erlojupekoan 1,33, hirugarren eta azken etapan ihesaldiari jo zion beste txirrindulari batzuekin batera, nahiz eta pelotoiak harrapatu zituen helmugara iritsi baino lehen. Ihesaldi horretan, dena den, hainbat mendiko pasotan aurrenekoa izan zen, eta 10 puntu lortu zituen. Horrek eman zion laugarren postua.
Hernaniarra, berriz, 73garrena izan zen 110 kilometrotako aurreneko etapan. Lasterketa azkarra eta urduria izan zen, eta Rodriguezek 3 minutu eta 38 segundora bukatu zuen, aurreneko sailkatuarengandik. Bigarren etapan, erlojupekoan, selekziokoak ez ziren gustora aritu. Semperena 62garren izan zen, 1,43ra, eta Rodriguez 86garrena, 2,10era. Dena den, hirugarren eta azken etaparako indartuta atera ziren berriro, 102,7 kilometroei aurre egiteko. Rodriguez 84garren izan zen hemen, eta berak ere lortu zuen mendiko batean aurrenekoa izatea. Azkenean, 80garrena izan zen sailkapen orokorrean.
Lasterketa gogorra izan bada ere, eta parte-hartzaile guztiak maila altukoak, Gipuzkoako Selekzioko txirrindulariak hiru etapak bukatzea lortu duten 104 txirrindulariren artean sailkatu dira;?Diaz 52garren, Fernandez 54garren, Orbea 64garren eta Pozo 81garren izan dira.