Gervais Memoriala erlojuzkontrako Gipuzkoako txapelketa izaten da 23 urtez azpikoetan eta junior mailan, eta gainera ospe haundia du. Pasa den asteartean jokatu zen, ia urtero bezala Aizarnazabalen, eta txirrindulari astigartarrak izan ziren protagonista nagusiak eta horien artean Azparren anaiak.
Xabier Mikel Azparren Gipuzkoako txapeldun izan zen 23 urtez azpikoetan eta bere anaia, Enekoitz, hirugarren juniorretan. Anai nagusiak ongi menperatu zituen aurkariak eta 34 segundu atera zizkion bigarrenari 21 kilometroko ibilbidean. Juniorrek 14 kilometro burutu behar zituzten banan bana eta Enekoiz Azparren garailearengandik 28 segundura geratu zen eta brontzea lortu zuen laugarrenarekiko sei segunduko aldearekin.
Ez ziren bailarako ordezkari bakarrak. Telmo Semperena astigartarra ere hamar lehenengo postuetan sailkatu zen juniorretan, bederatzigarren hain justu, eta postu bat atzerago, hamargarren iritsi zen Ibai Rodriguez hernaniarra. Ez dago dudarik pasa den asteburuko Loinaz proba, Beasainen, ongi etorri zitzaiola Xabier Mikel Azparreni Gervais prestatzeko, 20garren amaitu baitzuen. Enekoitz Azparren, Telmo Semperena eta Ibai Rodriguezek Segurako San Juan Sarian parte hartu zuten.
Jaime Romero selekzioarekin kontzentratuta
Ez da ahaztu behar Jaime Romero Europako Pista txapelketetan jardungo duela eta horregatik Espainiako selekzioarekin kontzentratuta dago.
Alebinek eta infantilek Zumaian izan zuten lasterketa eta bertan ibili ziren lasterka: Aimar Capdequi, Beñat Auzmendi, Mattin Plazaola, Unai Hernández eta Ekhi Rabanedo, besteak beste.
Ostiralean juniorrentzako Gipuzkoako Itzulia hasiko da
Asteburu hau eta datorrena lasterketaz josita datoz. Gaur, Juniorrak Anoetan egongo dira eta bihar Eibarren, baina beraien zitarik garrantzitsuena ostiralean hasiko da Gipuzkoako Itzuliarekin. Lau eguneko lasterketa da eta Oñatin hasiko da. Olaberri, Andoain eta Lazkaon amaituko dira 2garren, 3garren eta azken etapak.
23 urtez azpikoek Ataunen Gipuzkoako Txapelketa dute gaur eta kadeteek Gipuzkoako erlojuzkontrakoa Bergaran korrituko dute gaur eta bihar lineako Gipuzkoako Txapelketa, Oñatin.