Emakumeen ETE traineru liga gaur hasiko da Pasai Donibanen eta bertan hartuko du parte Hernaniko Maialen traineruak. Goizeko 11:30etan emango zaio hasiera I. Igartza Banderari.
Erlojuz kontra egingo da estropada eta bi luze eta bi ziaboga eman beharko dituzte ontziak sei edo bost txalupako bi txandetan. Helmuga eta irteera puntuak Pasai Donibaneko plazaren parean daude kokatuta.
Hernanirekin batera ariko diren klubak ondorengoak dira: Colindres, Hibaika, Pasai Donibane, Deusto, Isuntza, Kaiku, Lapurdi, Ondarroa, Tolosaldea eta Zumaia, hain zuzen ere.
Bihar ordu berean Pasaian eremua eta txandak aldatuta
Bigarren jardunaldia berriz bihar jokatuko da ordu berean, 11:30etan, baina oraingoan eremua eta formatua aldatzen dira. Estropada hiru txandetan banatuko da eta linean izango da San Pedro aldetik hasi eta lau luze eta hiru ziaboga eginez I. Adegi Banderan.
Arraun ikastaroa uztailean
11 urte gorako neska eta mutilentzat arraun ikastaroak antolatu ditu Arraun Elkarteak. Goizeko 10:30etan emango dira uztailaren 1, 3, 5, 8, 10 eta 12an Ibarluze poligonoan: Informazioa gehiago: Jon 688 877 475 edo ikastaroak.hernaniarrauna@gmail.com.