GALARRETAK erremonteko final berri bat biziko du gaur, 16:00etatik aurrera hasiko den jaialdian. Berria Txapelketa 2019ko finala izango da eta eguneko bigarren partidua. Finalistak dira hiru urnietar eta azpeitiar bat, horrek esan nahi du txapela Urnietara joango dela bai edo bai.
Gorriz, Ansa II eta Arruarte ariko dira, biak urnietarrak, eta urdinez, Goikoetxea V urnietarra eta Aizpuru III azpeitiarra.
Lehendabiziko jardunaldia ikusita inork gutxik espero zuen bi bikote hauek finalera iristea. Finalerdietara ligaxkan bigarren eta hirugarren sailkatuta iritsi ziren. Goikoetxea eta Aizpuruk, Zubiriren lesioa medio, lortu zuten finalerdian sartzea, eta gero finalerdian Juanenea izan zen lesioaren ondorioz erretiratu zena, 28-26 galtzen zijoaztenean finalistak. Ansa II eta Arruartek lehendabiziko partidua erraz galdu zuten, baina ondotik ederki eman diote buelta egoerari eta sendotasuna erakutsi zuten ligaxkako bigarren partiduan eta finalerdian.
Ansa eta Arruarte, faborito
Gorriak dira faborito eta pasa den asteartean finalerako pilotak aukeratu zituzten. Urdinek Ansaren jokoa sahiestu nahiko dute eta Arruarte zigortu atzean. Hori lortzeko pelota biziak eta asko ateratzen direnak aukeratu zituzten.
Hala ere, erremontean ia beti gertatzen den bezala sakeak zeresan haundia izaten du eta horretan Aizpuru III maisua da eta hori baliatu nahi dute txapela irabazteko.