Bizikletan ibiltzeko eguraldi oso kaxkarra izan bada ere, bailarako txirrindulari askok hartu dute parte, asteburuko lasterketetan; batzuk hemen inguruan, eta beste batzuk urruti.
Gipuzkoako jubenilen lasterketetan aritu da bikain Ibai Rodriguez hernaniarra. Larunbatean, hirugarren postuan sailkatu zen Zumaian. Atzetik aurrerako bidea eginez, ezin izan zuen Jon Gil irabazlea harrapatu, eta Haritz Chico bigarrenarekin iritsi zen, 28 segundura. Hegoi Urretabizkaia hernaniarra, berriz, 25garren sailkatu zen.
Igandean, berriz, Elgoibarren aritu ziren, eta 13garren izan zen Rodriguez, baina mendiko saria lortu zuen, eguneko mendate bakarretik, Elkorrietatik, aurreneko postuan pasata. Iker Iriondo eta Hegoi Urretabizkaia herrikideak, 31garren eta 46garren postuetan sailkatu ziren, hurrenez hurren.
Romero eta Azparren Valladoliden, eta Semperena Frantziako Gironden
Jubenilen mailan bertan, Valladoliden aritu dira, bi astigartar, Euskadiko selekzioak deituta: Jaime Romero eta Enekoitz Azparren. Taldekako erlojupekoa izan zuten larunbatean, eta bigarren postua lortu zuten, Nafarroako selekzioaren atzetik. Igandean, berriz, etapatik erretiratu zen Azparren, eta 53garren bukatu zuen Romerok, tarteko helmuga bat irabazi ondoren.
Telmo Semperena astigartarra, berriz, Frantziako Tour de Gironden aritu da, Gipuzkoako selekzioak deituta. Erlojupekoan 74garren izan zen, eta bigarren etapan, Alex Diaz taldekidearentzat lanean aritu zen, azkeneko igoerara bidean; nekearen eraginez, atzean geratu zen bukaeran. Eta azkeneko etapan, talde nagusian iritsi zen, 31garren postuan. Horrela, 51garren bukatu zuen, sailkapen nagusian.
Aimar Capdequi 6garren, eta Tasio Semperena 10garren
Alebin eta infantilek, Irunen zeukaten zita, igandean. Eguraldi txarrari aurre eginez, alebinetan, 6garren postua lortu zuen Aimar Capdequi astigartarrak. Beñat Auzmendi eta Aimar Zabala herrikideak, 16garren eta 19garren izan ziren.
Infantiletan, berriz, 10garren sailkatu zen Tasio Semperena.
Eta azkenik, kadete mailako txirrindulariak Eibarren aritu ziren, igandean bertan. Tropel haundia iritsi zen elkarrekin helmugara, eta horien artean sartu zen Unax Urretabizkaia hernaniarra, baina lehiatzeko aukerarik gabe, 55garren.