Zita garrantzitsuak zeuzkaten asteburuan, Hernaniko boleibol taldeek; eta gazitik zein gozotik izan zuten. Neska infantilek, Gipuzkoako Liga poltsikoratu zuten, asteburu gogorrean: hiru partidu jokatu dituzte, ostiraletik igandera; eta hiruak irabazi. Ostiralean 3-0 nagusitu ziren, Summa 2ren kontrako lehia erabakigarrian, denboraldiko partidu onena jokatuz. Eta larunbatean Summa 1 taldeari irabazita (3-0), ziurtatu zuten txapeldun izatea. Igandean, ezer jokatu gabe, 1-3 nagusitu ziren Arantzazuko Amaren kantxan. Larunbat honetan, Euskadiko Jokoetan ariko dira, Sestaon, Bizkaia eta Arabako txapeldunen kontra.
Neska kadeteek, berriz, Gipuzkoako finala zeukaten larunbatean, baina ez zuten aukerarik izan, hernaniarrek. 3-0 galdu zuten Fortunaren kantxan. Erabakigarria izan zen bigarren seta, zortzi puntuko abantaila galdu baitzuten hernaniarrek.