Asteburu garrantzitsua izan da Urumea bailarako pelotarientzat; eta bereziki, Hernaniko esku pelotarientzat, bi txapelketa garrantzitsuenetan parte hartuta. Ostiralean ekin zioten Herriartekoari, Adunan, eta 1-2 nagusitu ziren, final zortzirenetako joanekoan. Igandean, aldiz, Berria Txapelketatik kanporatu zuen Lazkaoko Lapkek, 2-1 irabazita.
Azkeneko horretan, kadeteen partidua zen klabea, eta 22-15 galdu zuten Apaolazak eta Etxarrik. Hortik aurrera, jubeniletan eta nagusietan nahiko argi zegoen zer gertatuko zen, eta hala izan zen: jubeniletan Salaberria-Lasak 22-5 galdu zuten, eta nagusietan Arrieta-Lizeagak 22-9 irabazi.
Bi egun lehenago, Etxarrik partidu gogorra jokatu behar izan zuen Herriartekoan. Hor, gauzak hobeto joan ziren hernaniarrentzat. Uitzik eta Etxarrik 22-15 irabazi zuten Adunako bikotearen kontra. Jubeniletan iritsi zen Adunaren puntua, 22-20 galdu baitzuten Salaberriak eta Zugastik. Baina nagusietan, Ojuelek eta Lizeagak erraz menderatu zituzten adunarrak (22-5). Bueltako partiduak Hernaniko frontoian jokatuko dira, ostiralean.
Astigarragak ere aurrea hartu du, Herriartekoan
Txomiñenen ere Herriartekoa jokatu zen ostiralean eta ez nolanahiko kanporaketa. Astigarraga eta Oiartzunen artean bizilagunen joanekoa jokatu zen, final zortzirenetan. Astigartarrak 2-1 aurreratu dira, eta abantaila hori eramango dute ostiral honetan, Oiartzunera.
Kadeteetan Aimar Mujika eta Ekain Lizeagak 22-6 irabazi zuten lehenengo partidua. Jubeniletan etorri zen oiartzuarren garaipena (22-12), Aldalur eta Urdangarinen kontra. Eta nagusietan, Loidi eta Santxez astigartarrek erraz menderatu zituzten bizilagunak (22-10).
Palaz, Hernanik aurrera
Palako Herriartekoan ere, ostiralean zeukaten zita, eta final laurdenetara pasea lortu dute hernaniarrek: bueltakoan ere 2-1 gainditu zuten Aia. Buruz buru frontoia osoan 20-8 irabazi zuen Lujanbiok. Eta binaka Manterolak eta Zubimendik 20-14 irabazita, sailkapena lortu zuten, Hernanirentzat. Zazpi barruan, ezer jokatu gabe, 20-14 galdu zuen Urreagak. Orain, Andoiango talde indartsua dute aurkari.
Astigarraga, aldiz, txapelketatik kanpo geratu da, bueltakoan hiru partiduak galduta, Donostiaren kontra.
Euskal Herriko eta Espainiako Trinkete Txapelketetan, garaipena lortu zuten Huizi eta Arrieta hernaniarrek, neska nagusien mailan. Eta jubenil mailan, Euskal Herrikoan, 30-9 galdu zuten Urdangarin eta Balerdi herrikideek.