Oso gertu izan zuen garaipena, aurreko asteburuan, Ibai Rodriguez txirrindulari hernaniarrak. Bigarren sailkatu zen Zarauzko Udaberri Sarian, jubeniletan, eta Alexander Fernandez Donosti Berriko taldekidea bakarrik izan zuen aurretik.
Eguneko ihesaldian sartu zen Telmo Semperena astigartarra, Donosti Berrikoa bera ere, beste bi txirrindularirekin. Eta 50 kilometroz ihes eginda aritu ondoren, helmugatik bi kilometro baino gutxiagora harrapatu zituzten, azkeneko igoeran. Orduan egin zuten aurrera Fernandezek eta Rodriguezek, denak gaindituz. 11garren izan zen Semperena, taldekako garaipena ere ziurtatzeko, eta justu bere aurretik, 10garren sartu zen Jaime Romero astigartarra.
Zilbeti 10garren, Abadiñon
Kadeteak, berriz, Abadiñon aritu ziren, Javier Elorriaga Memorialean; eta lasterketa bikaina osatu zuen Aner Zilbeti hernaniarrak, 10garren sailkatzeko. Gainera, taldekako garaipena lortu zuen Donosti Berrirekin, Ekhi Muñoz, Markel Rodriguez eta Unax Urretabizkaia hernaniarrekin batera. 26garren izan zen Muñoz; 67garren Rodriguez, ebakuntzatik bueltan; baina erorketa gogorra izan zuen Urretabizkaiak.
Gaztetxoak Torneoan ere, taldekako garaipena lortu du Donosti Berrik, horrela.
Telmo Semperena, Tour de Gironden gaurtik
Gaur, Eibarren ariko dira kadeteak, 10:30etan hasita. Jubenilek, berriz, Zumaian daukate zita gaur, 10:00etan; eta Elgoibarren bihar, 16:00etan.
Baina horietan ez, Frantziako Tour de Gironden ariko da Telmo Semperena, gaur eta bihar, Gipuzkoako selekzioarekin.