Beste urte batez, kanpora aterako dira Hernani Eskubaloi Taldekoak, Aste Santuko oporraldia aprobetxatuz. Eta aurreko urteotan Portugal aldera bidaiatu ondoren, etxetik gertuago egingo dute egonaldia, oraingoan: Basaurira joango dira gaur bertan, eta Basauri Bizkaia Handball Cup izeneko topaketetan hartuko dute parte, igandera bitarte.
Hernaniko sei talde ariko dira bertan: infantil mutilen bi talde eta nesken talde bat, kadete neska eta mutilen talde bana, eta mutil jubenilena. Guztira, 80 jokalari hernaniar izango dira Basaurin, baina espedizioa, beste 15 entrenatzaile, monitore eta fisioterapeutak osatuko dute; eta nola ez, jarraitzaileek.
Aurrenekoz antolatu dute Basauriko topaketa, aurten, eta 700 jokalari inguru elkartuko ditu, Estatu osoko 14 klubetako taldeetan. Izan ere, Euskal Herri osotik, Kataluniatik, Asturiasetik eta Valentziatik joango dira taldeak. Lau kiroldegi ezberdinetan jokatuko da txapelketa: Artunduaga, Urbi, Etxebarri eta Urreta. Egonaldiak, berriz, Jose Etxegarai eta Soloarte eskoletan egingo dituzte taldeek, eta bertako jatetxeetan egingo dituzte otorduak.
Elkarbizitzarako aukera, horrelako topaketek
Goizeko 08:00ak aldera abiatuko dira hernaniarrak, kiroldegitik; eta igandean bueltatu. Taldeak azaldu du, «garrantzia haundia» ematen diola horrelako topaketetan parte hartzeari: «batetik, elkarbizitzarako aukera ezin hobea delako; eta bestetik, beste lurraldeetan kirol hau jokatzeko modu ezberdinak ikusteko aukera ematen duelako», nabarmendu dute.
Klubak aurreratu du, zein diren bere helburuak, topaketa hauetan: «erakutsiko dugu kirola beste modu batera ulertu daitekeela, non partehartzea, lehia eta kiroltasuna eskutik doazen. Gazteak animatu nahi ditugu, taldera gerturatu eta eskubaloia probatzera».