Asteburu ona izan da Hernaniko boleibolarentzat. Infantilen neska taldeak bakarrik jokatu zuen ligako partidua, eta hau ezin hobeto joan zen, Zarauzko Lizardi taldearen aurka 3-0 irabazi eta gero. Emaitza ona izanik, hobea izan zen lehenengo eta hirugarren sailkatuen artean izandako emaitza. Aldapetako Summa 2 lehenengo sailkatua zegoen eta etxean Tolosako Laskorain taldearen aurka galdu zuen 1-3.
Orain Hernani lehenengo postuan kokatu da partidu bat gutxiagorekin eta lau partidu ren faltan. Summa 2rekin berdinduta daude 21 punturekin, baina donostiarrek partidu bat gehiago jokatu dute. Garaipenak bi puntu balio ditu eta porrotak puntua. Tolosak ere partidu bat gutxiago du, hernaniarrekin jokatu beharrekoa, hain zuzen. Lau partidu geratzen direnean, hernaniarrek bideratua dute Liga garaipena. Oso gaizki jokatu behar dute lehenengo postua galtzeko, hiru partidu galdu behar dituzte, beraz Liga eskura dute.
Partidu borobila, Hernanik
Lizardiren aurka garaipen erosoa lortu zuen Hernanik. Lehenengo bi jokoetan erraz gainditu zuen aurkaria 25-13 eta 25-8, bi taldeen arteko ezberdintasuna argi utziz. Hirugarren jokoan etxekoak lasaitu eta behar baino akats gehiago egin zituzten, puntu asko oparitu zizkieten aurkariei. Hala ere, 25-22 irabazi zuten etxekoek.
Kadeteek eta jubenilek atsedena
Talde kadeteak eta jubenilak ez dute jokatu pasa den asteburuan eta Aste Santuaren ondoren, Ligako lau onenen arteko ligaxka jokatu beharko dute. Urrea lortzeko aukera gehien kadeteek dute, eta gauzak ongi bidean, Fortunarekin borrokatu beharko dute lehen postua. Jubenilek zailagoa dute lehenengo postua lortzea, eta bigarrena dute helburu.