Bigarren bueltari hasiera eman diote erremontistek, Galarretan jokatzen ari den Sagardoaren Txapelketaren barruan. Ostegunean hasi zuten, hain zuzen, buelta hori, eta Bereziartua izan da aurreneko kanporatua. Izan ere, Uterga eta Labakak 40 eta 24 galdu zuten Gaztañagaren, hau da, Urriza eta Zalduaren aurrean.
Atzo, berriz, aurrez aurre aritu ziren B multzoko Oialume Zar eta Altzueta; 40 eta 28 irabazi zieten Goikoetxea eta Barrenetxea IVk Etxarri eta Ioni, eta beraz, Oialume Zar aurreratu da 6 punturekin, eta Altzueta lehengo 4 punturekin geratu da. B multzo horretan bigarren buelta jokatzeko faltan, lau eta bi punturekin daude, Setien eta Gurutzeta.
Asteazkenero zozketatuko ditu Kronikak edozein erremonte partidu ikusteko sarrerak. Parte hartzea irekia da, eta epea ez da itxiko.
A multzoan, berriz, kanporatua izatetik libratu bada ere, oraindik ere 3 punturekin dago Gaztañaga, eta Petritegi eta Larre Gainek launa puntu dituzte, oraindik partidu bakarra jokatuta. Hain zuzen, hauen arteko norgehiagoka izango da Sagardoaren Txapelketan jokatuko den hurrengoa; aurrez aurre ariko dira datorren ostegunean, hilak 21, Segurola eta Endika, eta Juanenea eta Azpiroz.
Sarreren zozketa irekita, astero parte hartzeko
Sagardoaren Txapelketakoaz gain, jardunaldi denetan jokatzen dira beste hiru partidu ere, ostegun eta larunbatero.
Horietako edozein ikusteko aukera daukate, doan, Kronikako irakurleek, astero zozketatuko baititu sarrera bikoitzak, asteazkenetan. Kronikalariek, berriz, aukera bikoitza izango dute sarrerak lortzeko, zozketan bi zenbakirekin parte hartuko baitute. Asteroko irabazleen berri ostegunetan emango da, eta norberak erabakiko du zein partidutara joan. Irabazi ez dutenek, berriz, zerrendan segiko dute hurrengo zozketan parte hartu ahal izateko. Parte hartzeko, Kronikara deitu (943 33 08 99/ 688 660 714) edo bulegotik pasa.