Maialen traineruak pasa den larunbatean hasi zuen denboraldia, hobe esanda, aurredenboraldiko lehenengo traineru jaitsiera jokatu zuen, eta bertako trainerua uretan ikustea ez da gutxi, aurretik izan dituen aldaketak kontuan izanda. Orioko 25garren traineru jaitsieran aritu zen Hernaniko trainerua, eta 14garren bukatu zuen, Orio garailearengandik minutu 1 eta 34 segundora.
Kanpoko begirada batekin agian emaitza motel bezala ikusi daiteke, baina barrurako begirada bat eginez gero baikor izateko arrazoiak badaude. Hasteko, aurreko urtean Zumaiarrekin egindako akordioari esker, posible izan zen trainerua osatzea. Pasa den larunbatean trainerua, gehienbat, Hernaniko Arraun Elkarteko neskez osatua zegoen. Bada aldea eta positiboa, gainera.
Zazpi arraunlarirentzako lehenengo traineru estropada
Xabier Zabala ?Bixkar? entrenatzailea tolete artean dabil aste osoa, lan eta lan, taldea eta ontziak prestatzen. Orion gauza berriak probatzen aritu zen. «Ongi irten zen eta helburuak bete genituen. Elkarteko gaztetxoekin aritu ginen eta gurekin dabiltzan Trintxerpeko hiru jubenilekin. Bertako batelean ibiltzen dira. 16-17 urteko zazpi neska uretaratu genituen. Horrela erabaki genuen aurretik, Orioko jaitsiera gazteekin egitea».
Denborari begiratzen bazaio emaitza kaxkarragoa lortu zen. 2018an 10garren izan zen Maialen garailearengandik minutu eta hamar segundora. Baina Xabier Zabala entrenatzaileak dioen bezala, «estropada guztiz desberdina izan zen. Marea, eguraldia, taldeak... dena aldatzen da denboraldi batetik bestera eta ezin dira emaitzak alderatu».
Orioko trainerua besteen aldean askoz ere hobeto dabilela ematen du, eta orokorrean, maila jaitsi egin da Zabalaren iritziz. «Oriok aurrerapausoa egin du eta gehixeago dabil, eta orokorrean, ontzi gehiago bai, baina mailak behera egin du. Nire irudipena da. Orio besteekiko desberdintasunak markatzen ari da, eta besteekiko pasa den urteko denbora aldeetan ibili ginen. Hala ere, zaila da ondorioak ateratzea».
Helburua beteta aurreneko estropadan
Lehenengo estropada zuten arraunlariak bazeuden, garai batean utzitakoak eta berriz hasitakoak ere bai. «Gehientsuenak lehenengo estropada zuten». Aurrera begira kanpotik errefortzuak ekarriko dira. Trainerua uretan ikustea poztekoa da. «Helburua bete genuela uste dut ikusita zer baldintzetan, jende berri askorekin, irten ginen. Lasaitasuna mantendu behar da, orain urduri jartzen hasten baldin bagara, bide horretatik ez dago gauza onik. Lanean ongi ari gara, estropada hauekin asko arduratu gabe».
Denboraldi hasieran hamar-hamaika arraunlari bazeuden entrenatzen eta kopuru hori gehitu da. «Urtarrilera arte zain egon behar zen ea nola zijoazen gauzak, eta dagoeneko martxoan gaudela ikusita, ziurtatu dezakegu udaran trainerua egongo dela». Aurredenboraldiko entrenamenduetan llagutean batzuetan, eta traineruan bestetan, entrenatzen dute.
Udara iristean kanpotik etorri daitezke arraunlari gehiago. Agian beste talderen batean lekurik ez duen arraunlariren bat. Pasa den urtean Kataluniako hiru arraunlari egon ziren Hernanin eta aurtengorako ere «ilusioarekin daude bueltatzeko hiru badalonatarrak» esan zuen Zabalak azaroan.
Datorren jeitsiera San Pedron eta batel estropadak
Hurrengo estropadari begira, hitz horiek esan, eta hiru hilabete eta erdi geroago esan daiteke bertan egongo direla egun batzuk barru. «Kanpotik ekarriko ditugu eta martxoaren 30ean Pasai San Pedroko jeitsieran irtengo dira». Hura izango da urteko bigarren traineru estropada eta udara aurretik egingo den azkenekoa.
«Traineruan asko ibili gabe irtengo dira. Kataluniar bat eta hiru valentziar etorriko dira. Aurrera pauso bat eman beharko genuke, gaztetxoenak geratuko baitira arraun egin gabe eta, nahiz eta kanpokoak berriak izan, traineruan gutxiago ibili diren llagutean konpetitzen ari dira. Konpetizio puntu hori hartua izango dute». Bateleko ligaxkan ez dira parte hartzen ari, baina entrenatzaileak hurrengo bi estopadetara eramango ditu. «Zumaian eta Ziburun dira eta egingo ditugu konpetizioak erritmoa hartzeko.