«Oso pozik» bueltatu da Iñigo Llopis hernaniarra Dublineko Igeriketa Egokituko Europako Txapelketatik, eta ez da harritzekoa, izan ere, bost domina eskuratu ditu: urrezko bakarra, S8 kategoriako estilo libreko 400 metrotan; bi zilarrezko (estilo libreko 100 metrotan eta bizkar estiloko 100 metrotan); eta brontzezko beste bi, estilo libreko 4x100 metrotan eta 4x100 metro errelebotan.
Dominez beteta zatoz Dublinen egin den Igeriketa Egokituko Europako Txapelketatik. Pozik?
Bai, oso pozik. Egia esan, ez nuen espero bost domina lortzea; asko jota bat edo bi (400 metro libreetan eta 4x100 metro libreetan) lortuko nituela pentsatzen genuen, baina azkenean uste baino emaitza hobeak lortu ditugu.
Denera bost izan dira irabazitako dominak: urrezko bat, hiru zilarrezko eta brontzezko bat. Horietako zein da ilusio gehien egin dizuna?
400 metro libreetako urrea izan da ilusio haundiena egin didana. Batetik, gehien prestatu dudan proba izan delako, eta bestetik, ez delako posible gure etxean Europako txapeldun bakarra aita izatea!
Lesio luze batetik zatoz, eta Munduko Serieetan errekorrak hautsi eta Dublineko azkeneko zita honetan, domina-jasa ederra izan duzu. Nola deskribatuko zenuke 2018ko aurreneko urte erdi hau?
Izugarria izan da berriro ere igeri egin ahal izatea. Eta gainera, txapelketetan parte hartzen hasi eta denboraldia horrela bukatzea… Ezin dut gehiago eskatu!
Zer moduz errekuperatu zara lesiotik? Nola izan da lanera buelta?
Oso ondo errekuperatu naiz. Pixkanaka gero eta konfiantza haundiagoa hartzen ari naiz hanka astintzerako orduan, eta hori seinale ona da.
Lanera buelta ere ona izan da, hainbeste denbora entrenatu gabe egon ondoren, igerilekura itzultzea izugarria izan da. Lan asko egin behar izan dugu; hasieran errekuperazioa landu dut eta gero, entrenamenduekin hasi nintzen, baina nire inguruko guztiek (medikuek, fisioterapeutek, entrenatzaileek, taldekideek, lagunek, familiak..) asko lagundu didate.
«Joko Paralinpikoak guztion ilusio haundiena dira. Bertara joateko bidea zaila izango da»
Zein izango dira zure hurrengo zitak? Eta etorkizuneko erronkak?
Hurrengo txapelketa garrantzitsua Malaysian izango da, Munduko Txapelketan (2019ko uztailaren 29tik abuztuaren 4ra bitarte jokatuko da), eta hara joateko gutxiengo denbora egiten saiatuko naiz aurten.
«Ez da posible gure etxean Europako
txapeldun bakarra aita izatea!»
Bi urte falta dira Joko Paralinpikoetarako. Nola ikusten duzu bidea? Duela bi urtekoa errepikatzeko gogoz?
Azken finean, Joko Paralinpikoak guztion ilusio haundiena dira. Bertara joateko bidea zaila izango da. Dena den, urtero helburuak jarri behar dira, eta orain munduko txapelketan pentsatu behar dugu.