Mugikortasunaren Europako Astearekin bat eginez, Astigarraga eta Hernaniko Udalek eta herriko elkarteek hainbat ekintza antolatu dituzte, mugikortasun jasangarria praktikan jartzeko.
Hernanin ostiralerako antolatu dira aurreneko ekintzak, baina Astigarragan, gaur hasiko dira. Ingurumen Sailak sustatuta, Ibili gurekin leloarekin, helburua da «mugitzeko era jasangarri eta osasuntsuak indartzea».
Bizikletak, gimnasia, patinak eta ibilaldia, Astigarragan
Mugikortasun Astearen bueltan antolatutako ekintzei hasiera emango diena Astigarraga izango da. Gaur bertan, bizikleta elektronikoak probatzeko aukera izango da, 15:00etatik 18:00etara Joseba Barandiaran plazan, eta gero, 18:30etan, txokolatada izango da, bizkotxoekin.
Bihar jarraituko dute, Joseba Barandiaran plazan goizeko 11:00etatik 12:00etara egingo den gimnasia saio irekiarekin.
Ostiralean, berriz, Martutenera ibilaldia egingo da bidegorrian zehar, eta bueltakoan pikoteoa izango da udaletxean. Hitzordua 11:00etan jarri dute, Joseba Barandiaran plazan.
Bukatzeko, larunbatean patinetan egingo da buelta herrian zehar, Joseba Barandiaran plazatik abiatuta, eta gero jolasak izango dira aukeran, frontoian. Guztia, 11:00etatik 13:00etarako tartean egingo da. Patinetan ibiltzeko kaskoa eta babesak eraman beharko dira.
Koxka elkartearen ginkana etzi, Hernanin hasteko
Hernanin hiru egun hartuko ditu Mugikortasun Asteak, ostiralean hasita. Urtero bezala, kirol egokituen ginkana egingo da, 17:30etatik 19:30etara, Atsegindegin. Besteen lekuan jartzeko asmoz antolatzen dute ginkana Kemenek, Hernadesek, AGIk eta AGAEBek, Hernaniko Koxka Elkartearen laguntzaz.
Astearekin jarraitzeko, eta Karabel auzoko jaiekin bat eginez, patin festa egingo da larunbatean. Aurreneko hitzordua 10:00etan jarri da Karabelen, eta 10:30etan abiatuko da ibilaldia Landare, Zubiondo, Ibaiondo, Akarregi eta Portun barrena, Karabelen bukatzeko. Gero, 11:30etan ginkana egingo da, eta 12:30etan erakustaldia egingo dute patinatzaile trebatu eta txapeldunek. Bukatzeko, hamaiketakoa emango zaie parte-hartzaile guztiei, 13:00ean.
Azkenik, igandean XIII. Bizikleta Festa egingo da, JOCC Zikuñakok ikastetxeekin elkarlanean antolatuta. Aurrena, ibilaldia egingo da 09:30etatik 12:00etara. Plaza Berrin hasi eta bukatuko da, Zinkoenea, Zubia, Karabel, Landare, Etxeberri, Sagastialde eta Urbieta pasata. Era berean, Atsegindegin bide heziketa zirkuitua egin ahal izango da 09:30etatik 12:00etara.