Bi hitzordu jarri ditu Egiari Zor elkarteak, «estatu terrorismoaren 40garren urteurrenaren harira», Tasio Arrizabalaga elkartekideak azaldu duenez.
Eta horietan aurrenekoa, datorren ostegunean izango da, arratsaldeko 19:00etan hasita, Biterin: El Triangulo de la Muerte dokumentala jarriko dute. Gainera, bertan izango dira Ricardo Mendiola alkate ohia, eta Imanol Laburu dokumentalaren zuzendaria. Dokumentala bera aurkeztu, eta testuinguruan kokatuko dute bi hizlariek; eta beraiei galderak egiteko aukera ere izango da, gero.
«Estatu terrorismoa martxan jarri zenetik lau hamarkada pasa ondoren, aldarrikatu nahi dugu, ardurak ez dituela inork bere gain hartu, eta badela garaia egia osoa jakiteko», dio Arrizabalagak.
Ekitaldia Tilosetan, urriaren 5ean
Bigarren hitzordua, urriaren 5erako jarri du Egiari Zor elkarteak. Ekitaldi bat egingo dute Tilosetan, arratsaldeko 18:30etan, «40 urteko inpunitatea salatzeko». Bertan hartuko du parte, besteak beste, Ane Muguruzak, 1989an erail zuten Josu Muguruza Herri Batasunako diputatuaren alabak. 40 urtez inpunitatea salatuz izango da leloa.