Hileko bigarren larunbateko dinamikari helduko diote berriro, gaurtik, Hernanin jartzen dituzten bi azokak.
Plaza Berrin izango da, ohi bezala, Behemendiren Azoka Ibiltaria. Goizeko 09:30etatik 14:30etara egongo dira, bertako produktuak eskainiko dituzten postuak.
Denetik izango da bertan: Hernaniko Zabalo-enea baserriko frutak, Urnietako Goiburu pateak eta Latxe baserriko barazki eta arrautzak, Errenteriako Aparola baserriko babarrunak eta gaztak, Listorretako lore eta landareak, Oiartzungo Arditurriko ogia, Mahalaren gazta, jogurt eta txerrikiak, Getariako Ezkurtxerri baserriko txerrikiak, eta Mañekoren tarta, pastel, madalena edota erroskillak.
Katuetxe elkartearen postua, bigarren eskukoan
Urbieta kalean, berriz, Bigarren Eskuko Azoka jarriko dute, 10:30etatik 13:30etara. Mota guztietako gauzak izango dira, berrerabiltzeko; eta oraingo txandan, nobedade izango da beste postu bat ere: Katuetxe elkartearena.
Elkarteari buruzko informazioa emango dute bertan, eta baita adopzioak nola egin azaldu ere. Era berean, bigarren eskuko gauzak salduko dituzte, eta konstrukzioko materiala bildu, katuentzako aterpe bat osatzeko: tabloiak, txapakumeak, apalak...