Berezia izango du aurtengo edizioa, Hernaniko Urtekariak. 25garrena da, eta hori horrela, edizio mardulagoa osatu dute: «aurreko 24 Urtekarien errekopilazio bat egin dugu. Ez da lan erraza izan bilduma egitea. 24 ediziotan, artikulu pila bat argitaratu dira, eta beraz, irizpide batzuen arabera egin dugu aukeraketa. 60 bat artikulu bildu ditugu guztira, aurtengo Urtekari honetan», azaldu zuen Txuso Gomezek, Udal Artxiboko arduradunak, herenegungo aurkezpenean.
Gomezek azaldu zuen, historia, ondarea eta generoa dituztela ardatz, artikuluek. Eta eskerrak eman zizkien, Urtekariaren ibilbide osoan edozein modutara parte hartu zuten guztiei; eta baita irakurleei ere, «urtero-urtero, Urtekariari eman diozuen harreragatik».
Biterin egin zuten aurkezpena, erakusketa gelan: «hemen egin dugu, Hernanin Ikusiyak erakusketaren azkeneko eguna delako; eta biek laguntzen digutela, erakusketak eta Urtekariak, herriaren historia ezagutzen», nabarmendu zuen Xabier Lertxundi alkateak. Eta berak ere eskertu zien lana, partehartzaileei eta Txuso Gomezi berari: «zuen lanagatik ez balitz, ezinezkoa litzateke».
Datorren astetik eskuragarri, udaletxean eta Biterin
Inprentarekin atzerapenak tarteko, 100 ale soilik banatu ahal izan zituzten aurkezpenean; eta gainerako 700 bat aleak, datorren astetik aurrera egongo dira eskuragarri, udaletxean eta Biterin.