Euskal kultura eta tradizioaren erdigune bilakatuko da Hernani, asteburu honetan, beste urte batez. Bihar eta etzi ospatuko dituzte Euskal Jaiak, eta makina bat ekintzarekin, egitarau bete-betea prestatu dute, bi egunetan.
Abeltzain azoka irekitzearekin batera emango zaio hasiera, bihar goizean. Tilosetan izango da, eta bertan egingo dituzte beste hiru saio ere, goiz eta eguerdian zehar: baserriko lanbideen erakustaldia aurrena, antzinako jokuak ondoren, eta herri kirolak azkenik.
Iturriaga kalea, berriz, dastaketetarako txoko bilakatuko dute. Izan ere, taloak dastatzeko aukera izango da lehenik, 11:00etan; eta txakolin dastaketa ondoren, eguerdian.
Doinu zaharrak eta modernoak, Musika Bandak
Trikitilarien doinuak nonahi entzuten direla, tailer, jolas eta txokolatada artean pasako dute arratsaldea, haurrek. Eta 19:45etan, Musika Bandarenak izango dira doinu horiek, udaletxeko arkupeetan. Udako etenaldiaren ondoren, denboraldiko aurreneko saioa eskainiko du, Jorge Pachecok prestatutako «erritmo biziko» programarekin. Doinu zaharrak eta modernoak uztartuko dituzte, musika estilo desberdinei tokia eginez.
Horrela, garai bateko martxa eta kalejirekin Euskal Jaien muinera iritsita, gaur egungo euskal rockera eta pelikuletako soinu bandetara ere egingo dute salto. Bertan eskainiko dituzte, Pablo Sorozabalen Deba, Florentino Peñafielen Los conformes, Silvanio Cervantesen La dominguera, edota Ramon Garciaren Peña mutilzarra.
Baina baita bestelakoak ere. Esaterako, aurten 25 urte bete dituen soinu banda bat ere joko dute: Hans Zimmerrek eta Elton Johnek The Lion King pelikularako osatutakoa. Eta borobiltzeko, gertuagoko hiru pieza: Itoizen Lo egin, Xabier Zabalak konpondutakoa; eta Gatiburen Bang-Bang Txik-Txiki Bang-Bang eta Zeu, zeu, zeu!, biak ere Roberto Pachecok moldatu zituenak.
Eta Musika Bandaren kontzertua bukatuta, dantzaldietarako tartea hasiko da: bi saio eskainiko ditu Iratzar taldeak, 20:00etan eta 23:00etan.
Pablo Lasa azoka, etzi
Etzi ere izango da zerekin gozatua, goiz eta arratsalde. Txistulari Bandaren dianaren ondoren, Pablo Lasa Artisau Azoka jarriko dute Tilosetan, Euskal Jaien barruan antolatu baitute aurten ere. Esku pelota eta pala partiduak ere izango dira bertan, eta sagardo dastaketa Plazan. Arratsaldeko erromeriak eta Basoa dantza ikuskizunak borobilduko dute festa.
EGITARAUA
BIHAR, larunbata
10:00, Abeltzain azoka, Tilosetan.
11:00, Talo dastaketa, Iturriaga kalean.
11:00, Baserriko lanbideen erakustaldia, Tilosetan.
11:30, Antzinako jokuak, Tilosetan.
12:00, Txakolin dastaketa, Iturriaga kalean.
12:00, Kalez Kale Kantari, Plaza Berritik abiatuta.
12:30, Erraldoi eta buruhaundiak.
12:30, Herri kirolak, Tilosetan.
16:30, Haurrentzako tailerrak, jolasak eta txokolatada, Tilosetan.
16:30, Trikitilariak, kalean zehar.
19:45, Hernaniko Musika Bandaren kontzertua, udaletxeko arkupeetan.
20:00, Iratzar taldearekin aurreneko dantzaldia, Tilosetan.
23:00, Iratzar taldearekin bigarren dantzaldia, Tilosetan.
ETZI, igandea
09:00, Diana, Txistulari Bandarekin.
10:00, XL. Pablo Lasa Artisau Azoka, Tilosetan.
11:00, Sagardo dastaketa, Plazan.
12:00, Esku pelota eta pala partiduak, Tilosetan; euria eginez gero, kiroldegiko frontoian.
18:00, Erromeria, Jaiki Hadi taldearekin, Plaza Berrin; euria eginez gero, udaletxeko arkupeetan.
19:30, Dantzaz Konpainiaren Basoa dantza ikuskizuna, Tilosetan.