Udaparkean egitasmoak lau urte beteko ditu aurten, eta esan liteke «sendotzen» ari dela, Koro Etxeberria kultura zinegotziak atzoko aurkezpenean adierazi zuen bezala. Urtero bezala, diziplina ezberdinak uztartuz eta adin guztietarako, eskaintza anitza eta zabala prestatu du Udalak, Ave Maria parkean, abuztuaren lehenengo hiru egunetan.
Aurten hori da nobedade nagusia: abuztuan egingo dela Udaparkean 2019, eta ez uztailean, aurreko urteetan bezala. Hori bai, datorren astean, uztailaren 25etik 27ra Gure Zirkua egongo da kokatuta Ave Maria parkeko behekaldean; eta Udaparkeanen barruan txertatu dute hori ere. Sarrera ia denak salduta daude, baina astelehenean takila irekiko dute, Ave Maria parkeko behekaldean, eta 15 bat sarrera salduko dituzte, emanaldi bakoitzerako.
Udaparkean egitasmoak, abuztuaren 1etik 3ra, Ave Maria parkea gozamenerako toki bilakatuko du, «adin guztietako jendearentzako, eta herritarrek berea egin dutena», azpimarratu zuen Etxeberriak; eta zehaztu, Udaleko sail guztien elkarlanarekin burutu dela.
Ttapa-Ttapa, ikuskizuna, antzezlana eta zinea, hasteko
Adin guztietarako antolatu dira ekintzak, eta abuztuaren 1ean hasiko dira, arratsaldeko 18:30etan, Ttapa Ttapa ibilaldiarekin. Adinekoei zuzenduta dago, eta Atsegindegitik abiatu eta Ave Maria parkean amaituko dute paseoa.
Ostegunean bertan, behin ibilaldia amaituta, El Fedito argentinarraren Oyun ikuskizunaz gozatu ahalko da. Ondoren, La Burla teatro konpainiak Económicas antzezlana eskainiko du, Sandra Ferrúsekin eta Vito Rogado hernaniarrarekin. Eta eguna amaitzeko Horma erlojua duen etxea filma jarriko da.
Jolasak eta dantza, protagonista, ostiralean
Ostiralean, haurrentzako jolasak eta dantza ikuskizunak izango dira eguneko saio nagusiak. Hasteko, 18:00etan, 0-3 urtekoentzat jolasak izango dira, Plisti plastaren eskutik, parkeko elementuekin; eta 5 urtetik gorakoentzat, El Amics d?en Crusó egurrezko jolas libre erraldoiak.
20:00etan hasi eta amaiera arte hiru dantza ikuskizun ere egongo dira Haatik, Ertza eta Korrontzi Dantzan taldeekin.
Bukatzeko, kontzertua eta ikuskizuna
Aurtengo Udaparkean larunbatarekin amaituko da, Vaiven Circo konpainiaren Esencial ikuskizunarekin, eta ondoren 2ZIO talde gipuzkoarrak eskainiko duen rap kontzertuarekin.
Gogorarazi nahi izan dute, bestalde, afari-merienda parkean bertan egiteko aukera egongo dela egunero, etxetik eramanda, edo bertan egongo den Furgo Farran erosita.
Azkenik zehaztu dute, eguraldia lagundu ezean Atsegindegin izango direla saioak.
UZTAILAK 25, 26 eta 27
18:00 eta 20:30, Gure Zirkua egongo da Ave Maria parkeko beheko aldean. Bi emanaldi egongo dira, egun bakoitzean.
ABUZTUAK 1, osteguna
18:30etan, Ttapa-Ttapa ibilaldia, Atsegindegitik Ave Maria parkera.
19:30etan, El Feditoren Oyun ikuskizuna. Guztientzat.
20:30etan, La Burla Teatro konpainiaren Económicas antzerkia. Guztientzat, gazteleraz.?
22:00etan, Zinea: Horma erlojua duen etxea. Familiarra. 105 minutu.
ABUZTUAK 2, ostirala
18:00etan, Plisti plasta jolasak 0-3 urtekoentzat, eta Toc de Fusta taldearen Els Amics d? en Crusó jolasa 5 urtetik gorakoentzat.
20:00etan, Haatik. 4 eme. Dantza. Guztientzat.
20:30etan, Ertza. Meeting point. Dantza. Guztientzat.
22:00etan, Korrontzi dantzan ikuskizuna. Guztientzat.
ABUZTUAK 3, larunbata
19:00etan, Vaiven Circoren Esencial ikuskizuna. Guztientzat.
20:30etan, Kontzertua: 2ZIO rap taldea. Guztientzat.
Egunero afari-meriendak parkean egiteko aukera, etxetik eramanda edota bertan erosita, Furgo Farran.
*Eguraldi txarra eginez gero, emanaldi denak Atsegindegira pasako dira.