ertzaintzak, Udaltzaingoaren laguntzarekin, Hernaniko taberna bateko nagusia atxilotu zuen astelehen goizaldean, drogarekin trafikatzea egotzita. Larramendi kalean, goizaldeko ordu bi eta erdiak aldera, hainbat bizilagunek poliziari eskatu zioten Hernaniko taberna batera joateko, ixteko ordua ez zirela errespetatzen ari eta zarata haundia zegoela esanez. Hori dela eta, Udaltzaingoaren patruila bat hurbildu zen bertara, lokala husteko, eta ordutegia ez betetzeagatik dagokion akta egiteko asmoz.
Behin lokalera sartuta, txoko batean doitasun-balantza bat eta substantzia sorgorgarriak izan zitzaketen hainbat ontzi ikusi zituzten udaltzainek, eta horren aurrean, berehala eman zioten horren berri, Ertzaintzari.
Trafikatzaileek erabili ohi dituzten tresnak
Hurbildu ziren ertzainek, atzeman zituzten hauts zuri baten kopuru esanguratsua zuten bi bilgarri, marihuana zuen poltsa bat, eta trafikatzaileek erabili ohi dituzten hainbat tresna; besteak beste, doitasun-balantza bat, labana bat, dosiak biltzeko prestatutako hainbat plastiko-zati...
Egoera horren aurrean, establezimenduaren arduraduna, 46 urteko emakumezkoa, atxilotu egin zuten droga-trafikoa leporatuta, eta Ertzain Etxera eraman zuten, beharrezko izapideak egitera, Agintaritza Judizialaren aurrera aurkeztu aurretik.