oporrak bakean 2019 programari esker, 314 errefuxiatu saharar izango dira aurten, Araban, Bizkaian eta Gipuzkoan, harrera familiekin. Horietako bost, 9 eta 12 urtekoak, Hernanin daude: Jadya Brahim Salem Hanafi (11 urte), Hayat Salma Bad (12 urte), Fatma Mohamed-Moulud (9 urte), Mansur Moh-Ali Moh Ahmed (10 urte) eta Said Ahmed Moh Salem (10 urte). Azkeneko bi haur hauentzat, esperientzia berri bat izango da, ez baitira aurretik egon bertan. Harrera bihar egingo zaie udaletxean, 13:00etan, eta abuztuaren 23an eta 24an itzuliko dira Tindufera.
Bi errealitateak ezagutzeko aukera
Bi hilabete hauetan, neska eta mutilek beste kultura bat ezagutu eta beste errealitate batekin topo egiteko aukera izango dute. Hala ere, hemengoek ere ikasiko dute; hau da, harrera familiek, enbaxadore gazte hauen bitartez, Saharako herriaren errealitatea eta gatazka zuzenean ezagutzeko aukera izango dute.
Ume hauen sorterrian, bizi baldintzak ez dira egokienak; hala nola, elikadura eskasia, eta osasun arreta gabezia. Hori dela eta, gure artean oporrak igarotzeak onura ekartzen die. Elikadura anitzagoa emateko aukera dago, osasun zerbitzuetan errebisioak egiten dira, eta behar izanez gero, tratamendua ere jarriko zaie.
Basamortuan orain tenperaturak 55 gradu gainditu ditzake, eta Iparraldean daukagun klima, atsegina izan daiteke haien osasunarentzat. Beraz, freskatu daitezela hemengo goxotasunarekin.