Axeri Dantzaren inguruan, DVDa kaleratu zuen Dobera Euskara Elkarteak duela urtebete, baina zenbait arazo tekniko zirela-eta, berritzea erabaki zuen.
Dagoeneko egin du lan hori, eta ostegunean aurkeztuko du, berriro ere. Arratsaldeko 19:00etan hasita izango da, Biteri kultur etxeko areto nagusian.
Sarreraren truke, DVD berria
Ekitaldian parte-hartzeko sarrera 5 euroan jarriko da salgai, eta horren truke, DVDa izango da, opari. Egun horretatik aurrera, Dobera Euskara Elkartearen bulegoan eskuratu ahal izango da DVDa 10 euroan.
Aurreko txandan DVDa erosi zutenek, berriagatik trukatzeko aukera izango dute debalde, bai ekitaldian bertan, edota Doberako bulegoan. Horretarako, DVD zaharra entregatu beharko dute.
Ondoren, Luis Telleriak egindako koadroa jarriko da enkantean.
Luis Telleriaren koadroa, enkantean
Aurkezpenaren ondoren, DVDaren harira Luis Telleria margolari hernaniarrak borondatez Dobera Euskara Elkarteari oparitutako koadroa aterako da enkantean. Hasierako prezioa 250 eurokoa izango da, eta prezio onena ematen duenak eramango du.
Osteguneko aurkezpen-ekitaldiaren aurretik koadroa ikusi nahi duenak, Dobera Euskara Elkartearen bulegoan izango du aukera: Larramendi 11 behea helbidean.