maiatzean Lehiaren Euskal Agentziak ebazpen osagarria eman zuen, Auzitegi Gorenak eskatuta, 2017ko abenduan emandako aurreneko ebazpenari zigorra jasotako 17 autobus-enpresetatik 16k eta Avitrans elkarteak helegiteak jarri ondoren. Auzitegi Gorenak «partzialki onartu» zituen helegite horietako batzuk, tartean, Hernaniko Garayar S.A. enpresak aurkeztua, «zigorrak behar beste justifikatuta ez zeudelako».
Hori horrela, Garayarri hasieran jarritako zigorra mantenduko da, eta ezingo da altuagoa izan; 47.940,27 euroan geratuko da. Izan ere, Auzitegi Gorenak zehaztu du «hasieran jarritako gehienezko kopurua errespetatu behar dela, non reformatio in peius printzipioaren arabera»; printzipio horrek adierazten du helegite baten ondorengo epai berriak ezin dituela aurreneko epaiaren baldintzak okertu.
«Proportzionaltasun muga» ere errespetatu, Garayarren kasuan
Ebazpen osagarrian «zigorren zenbatekoak kalkulatzeko erabilitako arrazoiak» zein izan diren zehaztu du Lehiaren Euskal Agentziak, Auzitegi Gorenak eskatuta.
Batetik, «zigor-tasa orokorra» zehaztu du, «arau-haustearen ezaugarrien arabera; zigor-tasa orokorra da erakunde arau-hausleak zigorra ezarri aurreko urtean (kasu honetan, 2016) egindako negozio-bolumenaren ehuneko bati dagokiona».
Bestetik, «banakako zigor-tasa, enpresa bakoitzaren jokabide zehatzaren arabera» ere zehaztu du.
Beraz, «zigor-tasa osoa aurreko biak gehituta lortzen da».
Hauek horrela, zigor-tasa orokorra %2,75ean» finkatu du Lehiaren Euskal Agentziak, «arau-haustea bakarra eta jarraia» izan delako, eta «oso larria». Enpresa bakoitzaren jokabidea baloratzeko, berriz, «arau-haustearen iraupena», «arau-hausteak eragindako merkatuaren dimentsioa», «arau-haustearen irismena» eta «aringarriak edo astungarriak aplikatzeko izan litezkeen gertakariak» hartu ditu kontuan.
Eta hori guztiaz gain, «proportzionaltasun muga» ere izan du kontuan zigorrak kalkulatzeko. Guziarekin, ondorioztatu du «Garayarri ez zaiola aplikatuko jokabidearen larritasunagatik eta arau-haustean izan duen partaidetzagatik aplikatu beharko litzaiokeen zigor-tasa; horren ordez, proportzionala den eta nahikoa disuasiosorioa den zigor-tasa bat ezartzea erabaki da, zehazki, 47.940,27 eurokoa».
Garayarrek helegitea berriro, «zigorra baliogabetu arte»
Lehiaren Euskal Agentziak 2015ean hasi zuen ikerketa Gipuzkoako 17 autobus-enpresa eta Avitrans (Gipuzkoako Bidaiarien Hiriarteko Garraio Enpresa Elkartea) elkartearen inguruan, eta 2017ko abenduan jakinarazi zuen ateratako ondorioa: «Gipuzkoan gutxienez 1988tik zebilen enpresen eta elkarte profesional baten kartelak, prezioak ebatzi eta ibilbideak banatzen zituen». Tartean zegoen Hernaniko Garayar S.A. enpresa, eta 47.940,27 euroko isuna ezarri zion.
«Helegite jarri genuen, eta arrazioa eman digute; zigorrak ezin du 47.940 eurokoa baino haundiagoa izan. Baina honi ere helegitea jarriko diogu, zigorra baliogabetu arte, ez baitauka zentzurik»
Ebazpenak hamazazpi autobus-enpresa zigortu zituen arau-hauste bakar eta jarrai oso larriagatik (...), eta 47.940,27 euroko zigorra jartzen zion erabilera bereziko garraio erregularreko (publiko eskolarra eta kolektibo pribatuak) eta lineaz kanpoko zerbitzuen akordioetan parte hartzeagatik, tarifak zehaztu eta merkatuak banatzeko, modu berean zigorra jaso zuen Avitrans enpresaren barruan eginak».
Gainontzeko enpresek bezala, Garayarrek helegitea jarri zuen, eta horren ondorioz eman du Lehiaren Euskal Agentziak ebazpen osagarria, maiatzean. Garayarko arduradunaren hitzetan, prozesua «etsipenarekin» bizi dute. «Helegitea jarri genuen, eta arrazoia eman digute; zigorrak ezin du 47.940 eurokoa baino haundiagoa izan. Baina honi ere helegitea jarriko diogu, zigorra baliogabetu arte, ez baitauka zentzurik». Hain zuzen, Garayarrek dio beraien ustez «Lehiaren Euskal Agentziaren irizpideak ez direla izan behar luketenak. Dagoeneko ordaindu dugun isun hori itzultzeko eskatzen dugu. Enpresa batzuei zigorraren zenbatekoa jaitsi zaie. Zigorraren zenbatekoa ez dago behar beste justifikatuta, eta berriro kalkulatu behar da. Helegitea jartzen jarraituko dugu, bukaerara arte jarraituko dugu, zentzu faltagatik zigorra bertan behera geratu arte».
Ebazpen osagarria maiatzean argitaratu zen, eta jakinarazi denetik, bi hilabeteko epea daukate enpresek, berriro ere helegitea jartzeko.