Argitalpen berria jarri du martxan Kontrakantxa Gaztetxeak: Hilerokoa. Argitu dute, «izenak aditzera ematen duen bezala, hilean behin» argitaratuko dela, eta «gorria» izango dela.
Denen eskura
Argitalpen hau hilabete bakoitzeko aurreneko astean plazaratuko da, Kontrakantxa Gaztetxean aurreko hilabetean garatu diren ekintzen inguruko kronikak jasotzeko. Maketatzaile eta erredaktore talde batek egingo du hilero lan hori.
Baina «ekarpenentzako atal bat» ere badagoela argitu dute. Hain zuzen, ekarpen horiek «idatzizkoak, argazki edo marrazkiak» izan daitezke, eta gaztetxearen helbide elektronikora bidali daitezke: kontrakantxagazte@gmail.com.
Horrez gain, bestelako atal bereziak ere izango ditu argitalpenak: Kontrakantxak dio, Poesia gaztetxeroa, Sakontzen...
Argitalpena doan lortu ahal izango da, eta edonoren eskura egongo da Kontrakantxa Gaztetxearen sare sozialetan edota paperean, gaztetxean bertan eta tabernetan.
«Beharrei» erantzuteko proiektua
Aurkezpenean azaldu zutenez, 2017ko abenduan hausnarketa prozesua jarri zen martxan gaztetxean, «etorkizuneko metak zehaztu, behar ezberdinak identifikatu eta hauekiko erantzukizuna» zehazteko.
Hortik ondorioztatu zuten «gaztetxeak kanpora begira bere jarduna aldarrikatzeko ezagaitasunaren inguruko kezka agerikoa» zela, eta «teknologia berrien garai hauetan, sare sozialetan ezer publikatu ezean, ezer gertatu izana ere zalantzan jarri» daitekeela. Horregatik sortu dute Hilerokoa.
Kronikaren antzekoa
Argitu dutenez, itxura aldetik «Kronika hartu da ardatz», modu kontzientean; «hasieratik eduki nahi izan baita harremana nola edo hala egunkari honekin». Hilerokoa Kronika barruan zabaltzeko elkarlanean pentsatu zen hasieran.
Hala ere, «independenteak izatea erabaki zen azkenean», zehaztu dute.