Udal hauteskundeen aurretik, azkeneko Plenoa egin zuten 2015-2019 legegintzaldiko udal ordezkariek. Azkeneko bi aktak onartu ondoren, dekretuen berri eman zuen Luis Intxauspe alkateak.
Horren ondoren ekin zioten bestelako gaiak aztertzeari. Bost gai izan zituzten mahai gainean, eta horietako hiru onartu zituzten aho batez: Arau Subsiadiarioen aldaketa, Idazkari eta Kontu-hartzaile lanpostuen sailkapena aldatzea eta onartzea, eta Udal Hilerriko Araudiaren aldaketa.
Bigarren puntuaz, Luis Intxauspe alkateak azaldu zuen legeak dioen bezala «20.000 biztanletik pasata, lanpostuen sailkatzea aldatu egin behar» dela; «2. mailatik 1go mailara pasatuko dira», hain zuzen, bi lanpostu horiek.
Hilerriaren kasuan, aspalditik eguneratu gabe zegoen informazioa eguneratzeaz gain, «araudiaren moldaketa egin da. Eta bide batez, hizkuntzaren txukunketa ere bai».
Udal gobernuaren aldeko botoekin onartu zuten Zerbitzu Sozialetako lanpostuen zerrendaren moldaketa. Horren arabera, 19 lanpostu finkatu dira: 9 klinika laguntzaile jardunaldi osoan eta 10 garbitzaile lanaldi erdian. Xabier Lertxundi Zerbitzu Sozialetako presidentearen hitzetan, «Zaharren Egoitzan dagoen egoera erregularizatzea» da honen helburua. Izan ere, Foru Aldundiak kudeaketa hartzen duenean, plantillak erregularizatuta pasa behar du, Lertxundiren esanetan.
Orain Hernani abstenitu egin zen «formengatik»; eta EAJ eta PSE-EE ez daude ados «klinika laguntzaileen lanpostuekin» egindako proposamenarekin.
Koro Etxeberria zinegotziak azaldu zuen azkeneko puntua: «udal eraikinak garbitzen dituen enpresak eskatu du kontratua ez luzatzea; Udalak onartu du, baina urtebeteko luzapena eskatu dio, esleitu bitartean». Orain Hernanik besterik ez zuen kontra egin, publifikatzearen alde egiten duelako.