Asteazkenean banatu zituzten CAF-Elhuyar Sariak CAFen Beasaingo egoitzan, eta bertan Iñaki Sanz-Azkue hernaniarrak jaso zuen garaikurretako bat, sarien 25garren urteurrenean.
Hain zuzen, zientzia-kazetaritzaren arloko lanen kategorian jaso zuen saria, Hegaztiak, erleak, zomorroak... Sagastien zaindari txikiak lanari esker. Lan hori Argia aldizkarian argitaratzeko idatzi zuen, eta Kronikak ere argitaratu zuen, Txotx denboraldiaren inguruko gehigarri berezian, urtarrilaren 19an.
«Xumea bezain erakargarria»
Antolatzaileek azaldu bezala, «zientziaren eta teknologiaren mundua gizarte osoarekin lotzeko asmoa» daukate CAF-Elhuyar sariek. Helburu horrekin argitaratutako 70 lan jaso zituzten epaimahaikideek; horietatik 24, Sanz-Azkueren lanaren kategoria berean, zientzia-kazetaritza arloan.
Arturo Elosegi Irurtia, ekologoa eta EHUko ikertzaileak; Marian Iriarte Ormazabal, kimikaria eta EHUko ikertzaileak; Alberto Barandiaran Amillano, kazetaria eta idazleak; eta Aitziber Agirre Ruiz de Arkaute, Elhuyar aldizkariko zuzendariak osatutako epaimahaiak erabaki zuen Sanz-Azkueren lana saritzea: «xumea bezain erakargarria da, eta aldi berean, lanketa sakona duena», adierazi zuten.
«Poza eta indarra»
Pozik hartu du berria Iñaki Sanz-Azkuek, eta hurrengo egunean ere, zorion mezuak jasotzen jarraitzen zuen: «pertsonalki kristoren poza eta indarra eman dit. Askotan, erreportajeak idazten dituzu, eta horien atzetik lan pila bat dago, baina gero, hor geratzen da erreportajea eta hor bukatzen da».
Horrez gain, poza eman dio «badakitelako epaimahaikideak direla pertsona batzuk dagoeneko esperientzia haundia daukatenak, eta gainera, lan asko aurkeztu dira». Eta dio, horrek emango diola «konfiantza eta indarra jarraitzeko».
Gainera, ekitaldian bertan azaldu zuen bezala Iñaki Sanz-Azkuek zientzia-kazetaritzan izan duen ibilbidea, duela ez hainbeste hasi zuen: «duela bi urte eta erdi idatzi nuen nire lehenengo erreportaje publikoa; nire ibilbidea motza da, eta bi urte eta erdira halako sari bat jasotzea ederra da!».