Hernaniko kultur ondarea aztertzeko eta ondarea.hernani.eus web gunean jasotako elementuak osatzeko asmoz Udalak eginiko bekarako izan dira hautatuak: Dobera Euskara Elkartearen Azeri dantza dokumentala eta Miren Garcia eta Alfredo Morazaren Hernaniko industria-ondarea Urumea bailaran zehar.
Dagoeneko lanean ari dira hautatuak eta dokumentala ikusteko aukera egongo da
Laster hernaniar guztiek Azeri dantzaren dokumentala ikusteko aukera izango dute. Proiektu honen ardatzak 2017an eginiko grabazioak dira, eta horien inguruan hartutako testigantzak. Eta, produkzio lanak bukatuta, ezagutzera emango da, esan bezala, ondarea.hernani.eus web gunean. Horrekin batera, beste hainbat ekarpen igoko dira aipatutako gunera.
Erdi arotik 1950 inguru arte jarduera industriala aztertzen eta ikertzen
Beste proiektuari dagokionez, Hernaniko industria-ondarea Urumea bailaran zehar alegia, bederatzi hilabeteko kronograma planteatuta, Urumea eta bere ibaiadarretan historikoki izandako jarduera industriala (burdinolak, errotak, irin-industriak, zementu-fabrikak edo zentralak) aztertzen eta ikertzen ari dira Miren Garcia eta Alfredo Moraza, Erdi arotik 1950 inguru arte.