Ekintza berezia antolatu du gaur, Hernaniko Gaztelekuak. Goizeko 11:30etan jarri dute elkartzeko zita, Gaztelekuan bertan; baina ez dira han geratuko: musika baflea, jatekoa zein edatekoa, eta materiala hartu, eta Ave Maria parkera mugituko dira.
Izan ere, parkean egingo dute gaurko festa, 12-17 urteko gazteek. Dena prestatu, eta eguerdiko 12:30etan hasiko dira, bi dantza saiorekin. Batetik, aerorunba egingo dute, Jenny Perlazaren eskutik. Eta bestetik, hip hop dantzatuko dute, Thiago Mithiksekin.
Bazkari musikatua eta ?slackline?, ondoren
Behin gorputza mugituta eta pixka bat nekatuta, indarrak berritzeko tartea hartuko dute, 13:30ak aldera, modurik onenean: bazkari musikatua egingo dute, Ave Marian bertan.
Eta festa borobiltzeko, beraien oreka eta abilezia erakusteko aukera izango dute gazteek, slackline eginez; zinta gainean ibiliz, alegia.
Irrisarri Landera joateko, izenematea zabalik
Bihartik aurrera, berriz, itxita egongo da Gaztelekua, apirilaren 23ra arte; baina indartsu bueltatuko dira. Tote-bag poltsak egingo dituzte 24an, eskulan tailerrarekin; eta muffinak 25ean, sukaldaritza tailerrean.
Eta 26rako, beste ekintza berezi bat prestatu dute Gaztelekukoek, Kale Hezitzaileekin batera: Irrisarri Land abentura parkera irteera egingo dute.
Joan nahi duten gazteek, aurrez eman behar dute izena, Gaztelekuan bertan.