Batzordetik pasatzen denean, datorren astean, «lizitaziora aterako da berriro», Kulturarteko Plaza Feministaren eraikina berritzeko proiektua.
Lehengo urteko abuztuan atera zuen Udalak aurrenekoz jatorrizko proiektuaren lizitazioa, baina hutsik geratu zen. Hori horrela, «proiektuan moldaketa batzuk txertatuta» aterako da berriro lizitaziora.
Energia eraginkortasunaren inguruko irizpidea, barne
Europako Batzordeak energia eraginkortasunaren inguruko irizpide batzuk ezartzen ditu, eraikin publikoak birgaitu edo berriak egiteko. Arau horien arabera, 2020 bukatzerako eraikin publiko berriak ?ia ezer kontsumitzen ez duen erakina? izan behar dute; Near Zero Energy Building (NZEB), hain zuzen.
Horregatik, Udalak arau horrek ezarritakoa hartu du kontuan Kulturarteko Plaza Feministaren eraikina berritzeko lizitazioa berritzean. Hori horrela, hainbat lan egingo dira: teilatuan eguzki panelak jarri, isolamendua bermatzen duten leihoak jarri, paretetan ere material isolatzaileak erabili... «Barruko tenperatura egokia mantentzeko moduko aktuazioak» egingo direla zehaztu du Udalak, «energiaren erabilera ahalik eta txikiena izan dadin».
Etorkizunerako, «erreferente»
Kulturarteko Plaza Feminista Garbiel Zelaia eraikinean kokatuko da, eta bi pisuko eraikina berritzeaz gain, kanpoaldeko espazioa ere egokituko da, egungo tokiko garapena eta enplegu gunearekin lotzeko.
Eraikina jatorrian ikastetxea zen, eta egin zen garaian ohikoa zen egitura hexagonala mantentzen du. Azpeitian, Donostian, Hondarribian edota Oñatin antzeko egitura daukaten eraikinak daudela nabarmendu du Udalak, eta, NZEB irizpideak kontuan hartuta Udalak egingo duen birgaitze mota hori «eraikin mota horietan gure inguruan egingo den lehenengoa denez, erreferentea» izan daitekeela dio.
Kulturarteko Plaza Feministak «emakumearen inguruan Udalak eskaintzen dituen zerbitzuak eta herrian feminismoarekin eta kultura aniztasunarekin lotutako mugimenduak» hartuko ditu.