Elorrabiko zubia 2011ko azaroaren 6an bota zuen urak uholde baten ondorioz eta berriz irekiko da. «Hurrengo egunetan» aipatu zuen astelehenean Luis Intxauspe alkateak. «Azken baimenaren zain gaude, baina aste honetan ez bada, hurrengoan irekiko da».
Erori eta gero instituzio desberdinen arteko elkarlanaren bitartez eraiki behar izan da zubia. «Horrek eraman du zazpi urte atzeratzea erori zenetik eraiki den arte. Proiektu eta kokapen desberdinak aztertu dira urte horietan eta azkenean erabaki zen aurretik zegoen leku ia berean eraikitzea. Proiektua Foru Aldundiarekin batera egin da eta obra Udalak eraman du aurrera. Egia esan Odisea bat izan da» azpimarratu zuen Intxauspek. 500 mila euroko aurrekontua izan du.
Hormigoizkoa eta iragazkorra
Zubia hormigoizkoa da, plataforma bat da, ez da zintzilik dagoen zubia. Malda du Elorrabi baserri aldera, altuagoa da eta iragazkorra da uholdeetaz babesteko.
Bi karril edukiko ditu bat bizikletentzako eta bestea oinezkoentzako. «Hernanirentzat garrantzitsua da oinezkoentzat pasoko lekua delako. Bizkletentzako ere bai gure bidegorrien sarean sartzen delako eta Hernani eta industrialdeak lotzen dituelako».
Auzotarrak, Arraun Elkartea eta Udala, inaugurazioan
Jendearentzat hurrengo egunetan irekiko da, baina inaugurazio ekitaldia ekainaren 1ean egingo da nabarmendu zuen Koro Etxeberria zinegotziak. «Herriarentzat Elorrabiko zubia beti izan da garrantzitsua eta inaugurazio propioa izatea beharrezkoa ikusten genuen. Honela herritarrekin batera egin nahi dugu inaugurazioa eta bereziki Osiñaga Auzo Elkartearekin. Elorrabin beste jarduera inportantea arrauna da eta beraiekin ere egin nahi da inaugurazio hori. Osiñagako festekin batera inauguratuko da, Udala, Arraun Elkartea eta Osiñagako auzotarrekin elkarlanean». Oraindik zehazteko dago nola izango den festa giroko inaugurazio hori.
Zubi zaharra auzotarrek eraiki zuten Hernanira eta Donostiarako bidera hurbiltzeko. «Jende hori kontutan hartuko da inaugurazioan».