Hernaniko Ttarla Dantza Taldeak urte luzeak daramatza haur zein gazteei Euskal Herriko dantza eta kultura erakusten. Plazaz plaza ibiltzen dira emanaldiak egiten eta apirilean 25 urte bete zituztela ospatzeko eskaini zuten emanaldi arrakastatsuaren ondoren, gaur, eguerdiko hamabietan txupinazoa botako dute udaletxeko balkoitik.
Ttarla taldekoek pozik hartu zuten notizia. Andrea Galan, Ttarla Dantza Taldeko kideak, urte askotan egindako lanari «merezitako errekonozimendua» egingo zaiola adierazi du.
Hala ere, txupinazoa azken momenturako utzi dutela ere esan du: «Hainbeste ekintza genituen egiteko, azkenerako utzi dugula txupinazoa, baina orain gerturatzen ari dela, konturatzen gara zer nolako garrantzia duen». Denbora aurrera doan heinean ilusio handiagoa dute eta 25 urte hauetan Ttarlan lanean ibili diren orori gonbidapena luzatu diete. Egun berezia izango da, etapa ezberdinetan ibili diren pertsonak elkartuko baitira. «Ilusio handiko eguna izango da eta eskerrak ematen dizkiogu herriari gu aukeratu izanagatik», esan du Galanek. Hala ere, urtero, txupinazoa nork bota, San Joanetako Jai
Batzordeak hautatzen du eta Ttarlakoek, taldeak 25 urte betetzen dituen honetan, beraiek izango zitekeenaren sumoa zuten.
«Ilusio haundiko eguna izango da eta eskerrak ematen dizkiogu herriari gu aukeratu izanagatik»
Beraz, balkoira igo eta txupinazoa botatzeko ardura bi haurrek izango dute. Kattalin Artola, Ttarla Dantza taldeko kideak azaldu du, irakurtzeko gai direnen adin tartea hartu zutela lehendabizi eta ondoren zozketa egin zutela. Bi haurrak talde berekoak izatea nahi zuten, beraien artean lasaiago egoteko, baina dantzari guztien izenean egingo dutenez poz handiz hartu zuten denek, ilusioz beterik dago talde osoa.
San Joanetan ere dantzan
San Joan jaietan dantzariek lana erruz egiten dute. Gaurko egunarekin Plaza Berriko txosnan lanean ibiltzeaz gain, San Joan suaren inguruan Desafioa dantzatzen dute eta ondoren herriko jendearekin batera, hasiera ematen diete jaiei, Alpargata dantzaren eskutik. 24an ere, presoen aldeko manifestazioan dantzatzen dute eta ondoren, taldeko afaria izaten dute.
San Joan jaiek kurtso amaierarekin egiten dute bat askotan eta horregatik lehenago egiten dituzte emanaldiak. Aurten 25.urteurrena izan dela eta, atzoko egunarekin Tilosetan emanaldi txiki bat egin zuten aurreneko aldiz lurrean, tablaturik gabe.
Taldearen antolakuntza
Ttarla Dantza Taldea adin ezberdinetako pertsonek osatzen dute eta askotan zaila izaten da antolakuntzaren aldetik aurrera egitea; hala azaldu dute taldeko kideek. Ikasturtea bukatzean urteko balorazioa egiteaz gain hurrengo ikasturterako matrikulak egiten dira, antolakuntzako lanak aurreratzeko asmoz. Galanek adierazi du, adinka antolatzen direla taldeak; hau da, urte bakoitzean jaiotako umeekin gehienez 30 kidez osatutako taldeak prestatzen dituzte. Beraz, kurtso berriari begira lan mardula dute. Hain zuzen ere, aurten jende asko animatu dela azpimarratu baitu.
Ondoren, ordutegiak, arduradunak eta bestelako gaiak zehaztuta dituztenean, ikasturtea hasi baino lehen, bilera bat egiten dute. Ttarla Dantza Taldearen antolakuntzan 18 pertsonaz osatutako talde bat dago Artolak adierazi duenaren arabera: «18 pertsona gaude, denak neskak, 2 mutil izan ezik. Hau horrela izan da beti, dantza taldea nesken espazio bat izan baita. Talde horretan gaude haurren irakasleak zein beste ardura batzuk dauzkagunak, izan daiteke diruzainaren ardura edo inauteriak edo gabonak antolatzeko ardura». Helduen talde bat ere badago, azkeneko lau urtetan hasi dena funtzionatzen plazako dantzak ikasteko.
«Gazte batzuk, taldean bilduta eta aurrera eramaten, nire ustez izugarrizko proiektua, azken finean funtzio haundia betetzen dugu herrian»
Beraz, datorren ikasturteari begira, 2013an jaiotako haurretatik hasita helduetara izango dira Ttarla Dantza Taldea osatuko dutenak. Hala ere, mutilak eta neskak bereiztuta daudela esan du Galanek: «2007tik aurrera, mutilen bi talde daude, alde batetik mutil txikiak eta bestetik mutil helduak». Mutilen kopurua nahiko murritza da, eta askotan beraiek bakarrik hasten badira nesken taldean, gerora desanimatzeko joera izaten dute. Hala adierazi du Artolak: «mutilen taldea identitate eta izaera propio bat sortzeko osatzen da».
Barne harreman biziak
Generazio aldaketak izaten dira taldean eta aurten horixe gertatu da. Horregatik erritmoa hartzea hasieran pixka bat kostatu zaien arren, espazio informalak edukitzea beharrezkoa ikusten dute, beraien arteko harremanak sustatzeko. Horretarako urtean zehar zenbait afari antolatzen dituzte. Talde guztiarekin horrelakoak egitea ordea, haurrak barne, oso zaila da. «Ni adibidez ez naiz irakaslea, orduan 230 haurretatik nik ez ditut erdiak ere ezagutzen. Andrea aldiz irakaslea izanda, haur bakoitza zein adinetakoa den kontrolatzen du», adierazi du Artolak. Antolaketa lanetan ibiltzen direnak ikasleak ere badira, haurrei erakusteaz gain beraiek ere irakaslea dutelako, bi rol ezberdin dira eta hori taldearentzat gauza positiboa dela dio Artolak.
Ttarlaren bi aldeak
Ttarlaren indargune bat aipatzerakoan Artolak argi dauka, azken finean gazte batzuk direla beraien gaitasunez, aurrera ateratzen atzetik izugarrizko lana daukan ekintza bat: «gazte batzuk, taldean bilduta eta aurrera eramaten, nire ustez izugarrizko proiektua, azken finean funtzio haundia betetzen dugu herrian». Gainera Artolak dio ez dela bakarrik dantza gustatzea, baizik eta zerbait gehiago dagoela, herrian horrelako gauzak egon behar direla sinestea eta horrelako espazioak egotea beharrezkoa dela haurrentzat zein gazteentzat.
Ttarlaren ahulgune bat aipatu beharko bazuten, bi gazteak ados egon dira, batzuetan bizkar gainean eramaten duten karga haundia izaten dela eta zaila egiten dela kudeatzea: «ardura haundia da hainbeste ume edukitzea, ondo gestionatu nahi izatea eta egia da batzuetan ez zarela iristen dena nahiko zenuen bezala egitera» eta batzuetan handiegi geratu daitekeen zerbait izatera iritsi daitekeela dio Artolak.
Etorkizunera begira
Orokorrean bai Artolak bai Galanek ondo ikusten dute etorkizuna, baina aurten taldean aldaketak egon dira eta horrek denbora eskatzen du, hala adierazi du Galanek: «aurten justu aldaketak egon dira, lau edo bost pertsona bakarrik gaude aurreko urtetik eta bat-batean bost edo sei pertsonak utzi zuten taldea. Orduan berriz funtzionatzen hasteko, gauzak ondo antolatzeko eta dena ondo eramateko, bere denbora behar du. Guretzat ere konpromezu bat da». Martxa hartzea kostatzen ari zaiela aitortu arren, Artolaren arabera, belaunaldiz belaunaldi gertatzen den gauza bat da. Gainera esperantza haundia daukate eta etorkizun polita ikusten diote taldeari: «guk espero dugu hemendik 25 urtetara guri deitzea esaten, 50 urte bete ditugula eta ea zerbait egingo dugun eta orduan guk ospakizun horretan ere parte hartu ahal izatea»