MIKEL AGINAGALDE
Neska-mutil koxkorrak zirenetik dabiltza elkarrekin, eta jada 50 bat urte dira koadrila sortu zutenetik. Hasieran dozena bat biltzen ziren Atsegindegi inguruan, gehienak han bertan bizi baitziren, baina gerora kide berriak gehitzen joan dira denboran zehar.
Gazte horiek orain zaharragoak dira, baina festan aritzeko ilusio berbera mantentzen dute. Ana Aranburu koadrilako kidea da, eta bere iritziz San Joan jaien funtsa ez da urteekin galdu, bai aldiz, parranda egiteko era. Lehen gautxoriak egunean zehar ibiltzen ziren hona eta hara algaran eta dantzan, eta orain ostera, giro gehiena, gazteen artean behinik behin, gauean egoten da.
Orain urte batzuk, gainera, txarangak izaten ziren kale animazio nagusia, eta Aranburuk dioenez, izerdi patxetan amaitzen zuten beti. Gauean, aldiz, ordu bietarako neka-neka eginda amaitzen zuten berbenan, eta oilasko errea eta txanpaina hartu ondoren ohera joaten zirela aitortzen du. Beste kide batzuk, ordea, parranda amaitu ostean Fagollagara joaten ziren, errekan bainu bat hartzera.
Omenduak, pozik
Topa egitearen ekimenari dagokionez, koadrila batzeko balio behar duela dio Aranburuk, eta egun horretan ospakizun berezi bat egingo dutela aitortu du. Hala ere, betiko usadioari jarraitzeko asmoa dute; lehenik eta behin hamaiketakoa egingo dute Hernaniko kaleetan, ondoren kalejira eta brindisa, eta azkenik, urtero legez, Astigarragako Kako jatetxera joango dira bazkaltzera
Bestalde, Muzki koadrilakoek diote oso ongi iruditzen zaiela San Joanetan herriko talde eta eragileak izatea omenduak, modu horretan, herritarren lana eta ekarpenak aitortu eta zoriontzen baitira. Beraientzat sorpresa izan da brindisa egin behar dutela jakitea eta egun polita izango dela uste dute.
«Oilasko errea eta txanpaina hartu ondoren ohera joaten ginen».
Akatsa argitu nahian
Azkenik, Muzki koadrilakoek taldearen izena aldarrikatu, eta argitu dute taldearen izena Muzki dela, eta ez ‘Muski’, hainbat lekutan agertu den bezala.
Beraz, hitzordua jarrita dago; gaur, koadrilen eguna, eguerdiko 13.00ean Gudarien Enparantzan.