Programa berria aurkeztuko du hilaren 14an ETB1k: Bostekoa. Bertan, bost herri-kirol proba egin beharko dituzte parte-hartzaileek, eta herrika, elkarren kontra ariko dira. Goizuetako talde batek hartuko du parte, eta gaur grabatuko dute saioa, Mungian.
Bertara joateko autobusa antolatu da, eta herri-kideak animatzera joango dira hainbat lagun, Leitzari aurre egiteko lanetan animoak emateko.
Final laurdenak, aurrena
Saioa Etxarriko Aitor Zubieta pelotari ohiak aurkeztuko du, eta datorren ostegunean hasita, ostegunero ikusi ahal izanen da ETB 1en.
Denera, 8 herri ariko dira elkarren kontra: Goizueta-Leitza, Ibarra-Tolosa, Elorrio-Abadiño eta Azpeitia-Errezil. Zuzenean final laurdenetan hasiko dira lehian, eta aurreneko erronka, finalerdietarako sailkatzea izanen da. Finala irabazten duenak 5.000 euro poltsikoratuko ditu.
Egin beharreko probak, berriz, Pentatlon Txapelketakoak izanen dira, hau da, bostekoa gainditu beharko dute: sokatira, 63 kiloko harriari hamar altxaldi, 25 kiloko bi txinga eraman, bost mozketa trontzan eta 470 kilo garraiatu, giza proban.