Udazkenaren etorrerak tristetzen duenak badauka zerekin alaitu, Goizuetara gerturatuz gero. Atalen Eguna antolatu du biharko Umore Onak, urtero bezala, eta horrez gain, hilaren bukaerarako Garagardo Festa antolatzen ari da herritar talde bat, Umore Onak babestuta.
Goizean hasita festa, biharko Atalen Egunean
Goizeko 11:00etan hasiko da bihar eguna, Irumaita txarangak jarriko duen musikarekin. Madalenatik aterako dira, Atalek lagunduta.
Segidan, Umore Onako pilotarien partiduak izanen dira frontoian, 11:30etan hasita. Hain zuzen, umeen mailako bina eta kimuen mailako bat jokatuko dira. Aurrena, Jon Larin eta Mañel Segesek osatutako bikotea ariko da, Haritz Aranberri eta Araitz Legarretak, erdi eta erdi, eta Beñat Narbartek osatutako taldearen aurka. Segidan, Mattin Garmendia eta Alize Sagardui ariko dira Josu Alsua eta Mikel Zurutuzaren kontra. Eta bukatzeko, Xanet Apezetxeak eta Adur Sagarduik Axel Salaberria eta Anartz Lujanbio izanen dituzte aurkari.
Haiek bukatuta, musika izanen da protagonista. Herrian zehar hainbat emanaldi eginen dituzte Umore Ona Abesbatzak, Dantza Taldeak eta txarangak.
Buelta guztiak bukatuta, bazkaritarako elkartuko dira denak 14:00ak aldean, Umore Ona elkartean. Bazkalondorenean dantzaldia izanen da Ganddegiko Luixen esutik, eta hortik aurrera, norberak jarriko dio bukaera festari.
Garagardo Festako afari txartelak 10 euro balio ditu, eta afariak, garagardo dastaketa barne, 18 euro.
Garagardo Festa, hilaren 26an
Festa gogoz geratzeko beldurrez, hurrengo ekitaldia ere antolatu dute, dagoeneko. Herritar talde baten ekimenez, eta Umore Ona Elkartearen babesarekin, Garagardo Festa prestatzen ari dira herrian, urriaren 26rako.
Iluntzean izanen da, afariarekin. Gaueko 21:30etatik aurrera, elkartean afaldu ahal izanen da, eta tartean, hainbat garagardo dastatu. Afariko menua zehaztuta dago: entsalada, saltxitxak patata purearekin, txerri sahieskia labean erreta, eta postrea, kafea eta kopak. Menu honek 10 euro balio ditu, eta garagardoak ez diren edariak elkartean bertan erosi ahal izanen dira: ura, sagardoa, ardoa...
Bestalde, menuarekin gozatzeaz gain, Garagardo Festarekin bat egin eta aukeran izanen diren bost garagardoak dastatu nahi dituenak, 18 euroko txartela erosi beharko du. Honi esker, aukeran izanen diren bost garagardoak edan ahal izanen dira: Otsaihen, Franziskaner, Leffe Blonde, Ago eta Oharas.
Afarian zehar, musika ere izanen dela aurreratu dute. Unai eta Enekoren trikitixa doinu eta pandero hotsak entzunen dira.
Txartelak, hilaren 22ra arte
Dagoeneko erosi daitezke txartelak; bai afaritarako bakarrik direnak, eta baita afaria eta garagardo dastaketarako direnak ere. Biak Amaia kafetegian izanen dira salgai, eta hilaren 22a, asteartea izanen da hauek erosteko azken eguna.
Antolatzaileek adierazi dute afaria Umore Ona elkartean eginen dela, eta beraz, lekuaren aldetik muga izanen dela.