Duela bederatzi urte berreskuratu zutenetik, ez du hutsik egin Karmen bezperako ospakizunak, Goizuetan; eta aurten ez da salbuespena izanen.
Gaur eginen dute, aurreko urteetako planarekin. Aurrena, tortilla lehiaketa antolatu dute, eta parte hartu nahi dutenek, arratsaldeko 20:00etarako entregatu beharko dituzte tortillak. Bi onenek izanen dute sari ederra, aurten.
Afaria norberak eramanda, baina edariak bertan
Eta ondoren, eginen dute herri afaria. 20:30etan jarri dute hitzordua, Plazan, eta norberak eramandakoarekin afalduko dute. Normalean, koadrilan edo taldean antolatzen dira, bakoitzak zerbait eraman eta konpartitzeko. Baina edariekin ez dute kezkatu beharko. Horiek, Umore Ona elkarteak eta Udalak jarriko dituzte: ardoa, freskagarriak zein sagardo kupela. Eta baita kubierto, mahai eta aulkiak ere.
Karmen bezperako sua, berriz, afaria hasi eta ordubetera piztuko dute, 21:30etan, Plazan bertan. Garai bateko ohiturari eutsiko diote beste behin, eta arbiaren zuztarrak erreko dituzte. Orain dela 50 bat urtera arte, Goizuetako baserri eta etxe gehienen atarietan erretzen zituzten, ereiteko haziak kendu ondoren; eta zuztarrekin batera, erretzen zuten urte hartan bertan bedeinkatutako erramu bat ere.
Herri afarian zein suaren gainean saltoka, giro onik ez da faltako behintzat, beste urte batez, Karmen bezperan.