Helpbidea proiektua jarri du martxan Nafarroako Gobernuak, «larrialdi eta arreta zerbitzu desberdinek Goizuetako baserri eta borda habitatuen inguruko datu-base bateratua izateko». Eta harekin bat egin du Goizuetako Udalak.
Proiektua aurkezteko, Goizuetan izan ziren Maria Jose Beaumont, Lehendakaritzako, Funtzio Publikoko, Barneko eta Justiziako kontseilaria, eta Isabel Anaut, Babes Zibileko Zuzendaria, maiatzaren 2an.
Baserriak identifikatzeko plaka indibidualak eta poste horizontalak jarriko ditu Udalak.
«Errazago eta azkarrago» iristea, helburu
Helburua da, «larrialdi eta arreta zerbitzuak baserrietara errazago eta azkarrago iritsi ahal izatea». Horretarako, baserri bakoitzak kode bat izanen du: «Baserriaren NAN antzeko honekin, zerbitzu publikoen datu baseak eguneratuak eta koordinatuak egonen dira eta larrialdietara 112ra deitzerakoan Helpbidea-kodigoa emanez gero, berehala inongo zalantzarik gabe argituko dute nondik deitzen den», azaldu dute.
Gainera, proiektua martxan jartzean diru-laguntzak atera zituen Gobernuak. Udala aurkeztu zen, eta diru horrekin, metro-baserria egiteaz gain, baserriak identifikatzeko plaka indibidualak eta poste horizontalak jarriko ditu.