Bihar emanen diote bukaera, goizuetarrek, otsailetik apirilera bitarteko kultur agendari. Eta ondo bukatzeko, pelikula bat jarriko dute: Errementari. Arratsaldeko 18:00etan izanen da, udaletxeko ganbaran, 16 urtetik gorakoentzat.
Lehenengo Gerra Karlistaren ondoren kokatzen da, filma, gerra bukatu eta 10 urtera. Arabako herrixka batean, Diputazioko komisario bat, Alfredo (Ramon Agirre), gertakari bat ikertzen ari da, eta arrastoek eramango dute basoaren sakonean dagoen errementeria beldurgarri batera. Bertan bizi da Patxi (Kandido Uranga), errementari arriskutsu eta bakarti bat. Hari buruzko istorio ilunak kontatzen dituzte inguruko herritarrek: lapurretak, hilketa, demonioekin egindako tratuak...
Egun batean, Usue (Uma Bracaglia) izeneko neskatxa batek, lortuko du errementeria misteriotsuan sartzea, eta agerian utziko du, Patxi Errementariak ezkutatzen duen egia izugarria.
Paul Urkijok zuzendu du filma, eta 98 minutuko iraupena dauka. 2018an, Goya sarietan nominatu zuten, efektu espezial onenen saria jasotzeko hautagaien artean.