Ez da finalean izango Astigarraga, Euskal Herriko?Herriarteko Txapelketan. Kontrario gogorregia izan zen Zeanuri, Bizkaiako txapelduna, atzoko semifinalean; eta aurreneko bi partiduak irabazita nagusitu zitzaizkien. Astigartarrek, behintzat, lortu zuten garaipen batekin bueltatzea.
Kadete mailako partiduarekin hautsi zuen kanporaketa, Zeanurik. Ekain eta Eñaut Lizeaga anaien garaipenetara ohituta dago Astigarraga, baina?Erkiaga eta Emaldi bizkaitarrak gehiago izan ziren atzo. 4-6 hasi baziren, berehala egin zieten ihes, partzial beldurgarri batekin, 5-20 jartzeraino. Bukaeran txukundu zuten markagailua, 10-22 bukatzeko.
Antzeko gertatu zitzaien, jubeniletan, Aimar Mujika eta Ganix Urdangarini ere. 5-5 berdinduta hasi, eta 6-15 eta 7-21 egin zieten ihes Urigoitiak eta Erkiagak, azkenean 8-22 bukatzeko. Horrekin, garaipena ziurtatu zuen Zeanurik.
Baina nagusietan, kontsolazio gisa balio dezakeen garaipena lortu zuten Harri Loidik eta Jokin Santxezek, 22-7 irabazita, Mendia eta Beldarraini. Hasieratik izan ziren nagusi, 5-0 eta 16-4 aurreratuz.
Finalean, Zeanurik Doneztebe izango du kontrario, Laguardiari hiru partiduak irabazi ondoren. Ez zuen semifinala jokatu Iker Salaberria goizuetarrak, baina Donezteberekin aritzen da bera.