Denboraldiko lasterketa garrantzitsuenetako bat izan zuten aurreko asteburuan, junior mailako txirrindulariek: Gipuzkoako Itzulia, hiru etaparekin. Eta beste behin, protagonista izan ziren Urumea bailarakoak. Bereziki fin ibili ziren Ibai Rodriguez hernaniarra, sailkapen nagusian bosgarren, podiumetik gertu; eta Enekoitz Azparren astigartarra, zazpigarren.
Erlojupeko labur batekin (2,1 kilometro) eman zioten hasiera Itzuliari, Oñatin; eta Telmo Semperena izan zen bailarako onena, 12garren, 6 segundura. 19garren izan zen Jaime Romero, 39garren Azparren, eta atzerago, Rodriguez, 21 segundura.
Bigarren etapan hasi ziren nabarmentzen, Rodriguez eta Azparren, Olaberrian. Onenen artean izan ziren biak, eta garaipenetik oso gertu, hirugarren izan zen Azparren, aurreko bikotetik lau segundura. Rodriguez, berriz, seigarren sartu zen, 1:15 galduta. Eta horrekin, bosgarren eta seigarren iritsi ziren biak, sailkapenean, Lazkaoko etapa erabakigarrira.
Azkeneko horretan, hernaniarra ibili zen bikain, bigarren eginda, eta sailkapen nagusiko kontrario guztiei 40 segundutik gorako tartea aterata. Horrela, asko gerturatu zen azkeneko sailkapenean, podiumeko postuetara; baina bosgarren izan zen, 45 segundura, eta podiumetik 33ra. Azparrenek, berriz, egun txarra izan zuen, eta etapan 4:46 galduta, zazpigarren postua eskuratu zuen behintzat, sailkapen nagusian.
Bakarrik ez, baina taldearekin bai, podiumera igo zen Ibai Rodriguez, Semperenarekin, eta Hegoi Urretabizkaia eta Iker Iriondo hernaniarrekin: laugarren urtez jarraian irabazi du Donosti-Berrik, taldekakoa.
Xabier Mikel Azparren, Espainiako txapeldun
Egun hauetan, berriz, Espainiako Txapelketak dira zita nagusia, txirrindularientzat. Eta ostegunean, haundia egin zuen Xabier Mikel Azparren astigartarrak: 23 urtez azpikoen mailan, Espainiako txapeldun izan zen, erlojupekoan. Gaur izango du iraupen proba, 09:30etan hasita, Archenan (Murtzia).