Asteburura itxaron gabe, asteazkenean izan ziren lasterketak, jaieguna aprobetxatuz. Eta jubenil mailan, ez zen astigartarrik eta hernaniarrik falta, Segurako Santikutz Proban.
Baina parte hartu bakarrik ez, ederki aritu ziren; bereziki, Jaime Romero astigartarra. Lasterketa osoan izan zen protagonista, eguneko bost mendateak aurreneko hiru postuetan pasata, eta tropela erabat txikitu zenean, aurre-aurrean mantentzeko gai izan zen: bigarren helmugaratu zen, Iñaki Diazen atzetik, 10 segundura. Eta mendiko saria ere, Romerorentzat izan zen, alde nabarmenarekin.
Partehartzaile gehienak, banaka sartu ziren helmugan, eta 7garren iritsi zen Enekoitz Azparren astigartarra, minutu pasatxora. Iker Iriondo eta Ibai Rodriguez hernaniarrak, elkarrekin iritsi ziren, 17garren eta 18garren, hurrenez hurren.
Juniorrak Astigarragatik pasako dira bihar
Gaur eta bihar ere izango dira lasterketak, kategoria gehienetan. Juniorrak, Lazkaoko Proban ariko dira gaur, 16:00etan hasita; eta zita garrantzitsua daukate bihar, 10:15etan Donostiako Egia auzoan, Gipuzkoa Klasika nazioarteko probarekin. Maila haundiko partehartzea izango da, eta lasterketa gogorra daukate aurretik. Astigarragatik pasako da, gainera: sei aldiz igoko dira Bentetara, hiru aldiz alde bakoitzetik; azkenekoa, helmugatik 8 kilometrora, Astigarragara jaitsi eta Martutenerako bidea hartzeko.
Bi zita dauzkate, kadeteek ere. Gaurkoan, Elgoibarren ariko dira, 10:30etan hasita; eta bihar, Ander Larrea Memoriala lehiatuko dute Gasteizen, goizeko 09:30etan hasita, Gaztetxoak Torneoari dagokiona.
Eta azkenik, infantilak eta alebinak lehiara bueltatuko dira gaur, Irunen, proba berezi batekin: Gipuzkoako Taldekako Erlojupeko Txapelketa izango dute jokoan, 16:00etan hasita.
23 urtez azpikoek atseden hartuko dute asteburuan, datorren asteko zita garrantzitsuaren aurretik: Bidasoa Itzulian ariko dira, maiatzaren 8tik 12ra, lau etaparekin.
Hernaniko zikloturistak, Lesakara bihar
Zikuñako Ama zikloturista taldeak, bere aldetik, denboraldiko 10garren irteera egingo du bihar. Lesakara joango dira, 84 kilometroko ibilbidea eginez; eta goizeko 08:00etan jarri dute hitzordua, Zinkoenean.