Lasterketa gutxiago izan dituzte joan den asteburuan, txirrindulari astigartar eta hernaniarrek; baina sekulako maila eman dute, beste behin.
Zegaman zeukaten zita, junior mailakoek, Elkartu Nahi Saria lehiatzeko. Eta onenen artean ibili ziren, Urumea bailarakoak. Eguneko ihesaldian sartu zen Telmo Semperena astigartarra, dozena bat lehiakiderekin; eta lasterketa buruan egin zituzten 40 bat kilometro. Atzetik, Enekoitz Azparren astigartarra aritu zen lanean Lierniako bi igoeretan, Limousineko Iñaki Diazekin, ihesaldia harrapatzeko. Barbariseko igoeran hasi zen erabakitzen lasterketa. Ihesaldian, Bellota taldeko Alex Diazek egin zuen aurrera, eta atzetik, asko gerturatu zitzaizkion Azparren eta Iñaki Diaz, gainerakoak gaindituta. Atzetik aurrera egin zuen Ibai Rodriguez hernaniarrak ere.
Arriskuak hartuz, sekulako abiaduran jaitsi zen Iñaki Diaz, iheslaria harrapatu eta gainditzeraino, eta hirugarren postuarekin konformatu behar izan zuen Azparrenek. Minutu bat beranduago, zazpigarren iritsi zen Ibai Rodriguez. 15garren sailkatu zen Semperena, eta 34garren Jaime Romero.
Beñat Auzmendi, seigarren
Alebin eta infantilek, bestalde, Aizarnazabalen zeukaten lasterketa. Alebinetan, Beñat Auzmendi astigartarra izan zen onena, seigarren postuan, eta 10garren eta 12garren helmugaratu ziren Harri Garcia eta Aimar Zabala herrikideak. Nesken artean, zortzigarren izan zen Noa Rodriguez hernaniarra.
Infantil mailan, berriz, bigarren sailkatu zen Intza Navarro hernaniarra, nesketan; baina bailarako inork ezin izan zuen lasterketa osatu, mutiletan, Lander Sanz garaileak doblatu egin baitzituen ia partehartzaile guztiak.
Kadete mailako txirrindulariak Nafarroa aldera joan ziren, Atarrabiako lasterketara; eta 19garren iritsi zen helmugara Unax Urretabizkaia hernaniarra. Aner Zilbeti herrikidea, berriz, 35garren izan zen.
Eta 23 urtez azpikoetan, azkenik, Xabier Mikel Azparren astigartarra aritu zen Urrakiko Igoeran, 58garren bukatuta.