Berezia zen, Mundarrok larunbatean jokatu behar zuen partidua, Zarkumendegin, Erregional Preferenteen mailan. Berezia, Mikel Gartziarena Gartzi kapitainaren azkenekoa zelako, zaleen aurrean. Eta urte guzti hauetako lana eskertzeko, omenaldia egin zioten, partidua hasi aurretik: kamixeta bere izenarekin eta dortsalarekin; oroigarri bat; eta Joxerra Garzia idazleak kantatu zizkion bertsoak.
Eta bigarren opari bat ere izan zuen: taldearen garaipena. Izan ere, 4-1 nagusitu zitzaion talde morea, Trintxerperi.
Partiduan sartzea kosta zitzaion arren, pixkanaka jaun eta jabe izan zen Mundarro, eta bi gol egin zituen, Beñat eta Koldoren eskutik, atsedenaldirako. Aldageletatik bueltan, faltaz sartu zuen hirugarrena Iñurrik, baina ordu laurden falta zela iritsi zen momenturik bereziena: kapitaina aldatu zuten, eta zaleek zutituta, txalo zaparrada batekin agurtu zuen Zarkumendegik, Mikel Gartziarena.
Hortik partiduaren bukaerara, gol bana egin zuten Trintxerpek eta Mundarroko Gaztek.