Argia eta itzala tokatu zaizkie joan den asteburuan, esku pelotari hernaniar eta astigartarrei, garaipen garrantzitsuekin eta porrota mingarriekin.
Astigartarrek ezagutu dute itzala, Udaberri Torneoan. Finala zeukaten jokoan larunbatean, Txomiñenen bertan, Axel Larrañaga eta Ganix Urdangarin jubenilek, bigarren mailan. Baina gehiago izan ziren kontrarioak, Alde Zaharrako De La Torre eta Acha, eta 8-22 galdu zuten, esku hutsik geratzeko.
Txapelketa berean, ordea, argia aurkitu zuten Unax Uitzi eta Unai Albeniz kadete hernaniarrek. Izan ere, erraz irabazi zuten semifinala, Lapke taldeko Etxezarreta eta Telleriaren kontra (22-7), Hernanin bertan. Nagusi izan ziren hasieratik, pelota bizia aprobetxatuz. Albeniz oso seguru aritu zen atzean, Telleriaren kolpeak ondo eutsiz; eta Uitzik markatu zuen diferentzia, sakearekin min eginez eta aurreko koadroetan nagusi izanda.
Garaipen horrekin, finala jokatzeko sailkatu dira: ostiral honetan bertan izango dute, Alegian, Ilunpeko Egiguren eta Labakaren kontra; printzipioz, iluntzeko 20:00etan.
Txintxurretak eta Elizazuk 18-17, plenoa osatzeko
Beste zita garrantzitsua, Gipuzkoako Txapelketan zeukaten hernaniarrek; zehazki, Auritz Txintxurreta eta Aiur Elizazu infantilek. Semifinaletara sailkatuta egonda ere, ligaxkako azkeneko partidua zeukaten, Aloña Mendiko Barrena eta Aldearen kontra. Lasaiegi atera ziren hernaniarrak, eta beraien postua aldatu behar izan zuten kantxan, partiduan zehar; baina buelta ematea lortu zuten, eta 18-17 nagusitu ziren, plenoa osatzeko: ligaxkako partidu guztiak irabazi dituzte.