Euskal Sagardoa Jatorri Deitura duten sagardoekin eta euskal produktuekin osatutako afariarekin gozatu ahal izango da larunbatean, Txiki tabernan. Afari txartelak salgai daude, dagoeneko, 20 euroan.
Sei sagardo, 2018ko uztakoak
Bertako sagarrekin egindako sagardoak dira Euskal Sagardoa Jatorri Deituraren zigilua, txapela gorria, daukaten sagardoak. Lehengo urtean hainbat dastaketa egin ziren sagardo hauek hobeto ezagutzeko, eta bide beretik antolatu da berriro ere afari maridatu bat, larunbat honetarako.
Horrela, larunbatean Astigarragako Txiki tabernan egingo da afari maridatua. Bertan, 2018ko uztako sagardoak dastatuko dira, «goren gorenean dauden garaian», antolatzaileek azaldu bezala. Baina, era berean, «egunotan egiten ari diren 2019ko uztaren ezaugarri batzuk ezagutzeko aukera» ere izango da.
Denera, sei sagardo dastatu ahal izango dira. Hain zuzen, Txiki tabernak kartan dituen sei Euskal Sagardoak: Alorrenea, Bereziartua, Gartziategi, Lizeaga, Petritegi eta Zelaia.
Besteak beste, sagardotegi bakoitzaren ukitua nabaritu ahal izango da dastaketan; sagardoen arteko desberdintasunak eta erabiltzen diren sagar motek ematen dioten ukitua.
2018ko uztako sagardoak dastatuko dira, eta 2019ko uztaren ezaugarri batzuk ezagutu.
Txartelaren prezioan, sagardoa eta afaria
Sagardoekin batera, euskal produktuekin osatutako menua dastatu ahal izango da afarian: Zubeltzu gildak, Eusko Label tomate entsalada, ajoarrieroa tenperatura bajuan egindako arrautzarekin, Eusko Label txahal sahieskia eta Idiazabal Gazta.
Afari txartelak 20 euroan daude salgai, Txiki tabernan.