«EAJ legealdi osoa dabil Santiagomendiko Paisaiarekin atzera eta aurrera» dio EH Bilduk. Printzipioz, begi onez ikusten ditu Santiagomendiko paisaia babesteko ekimen guztiak baina beste eremu batzuekiko EAJk izan duen «axolagabetasuna» salatzen du: «Txoritokietan kamioien aparkaleku erraldoia egingo da, eta Putzueta (Rofer-Buenaventura harrobiaren inguruak) inguru degradatuan ez da aurrerapausorik eman»...
EH Bilduren arabera «azken momentuan, EAJk Santiagomendiko Paisai Planarekin lortu nahi duena agerian utzi du: egungo aterpetxea bota eta ermita ondoko zelaigunean eraikin berri bat, autoentzako aparkaleku gehigarri bat egin eta parke tematiko bat sortu».
EH Bilduk aurkako botoa eman zion egitasmo hau baimendu nahi duen hirigintza dokumentuari
EH Bildu, «zalantzarik gabe», honen aurka azaldu da. Batetik, EH Bilduk ez du uste herri honen lehentasunen artean aterpetxea bota eta berri bat egitea dagoenik. «Astigarragaren lehentasunak beste eremuetan daude: DBH, haur-eskola, garraio publikoa, landa-eremuko bide eta espazioen berritzea». EH Bilduk ez dio zentzurik ikusten Udalak dirutza bat honetan gastatu behar izateari. «Aterpetxea egokitu behar dela begi-bistakoa da baina aterpetxea bota eta berri bat egitea lekuz kanpo» dagoela uste du EH Bilduk.
«Santiagomendi ez da babesten»
Bigarrenik, «EAJren asmoa hasieratik Santiagomendiko Paisaia babestea omen zen» baina EH Bilduren ustez, «ekimen honekin aurkakoa lortzen da. Herriko gune preziatua babestu eta mantendu beharrean, erabat aldatu eta artifizializatuko da. Aterpetxe berria Ermitaren azpialdean dagoen berdegunean kokatuko litzateke eta hauen artean bidezidorrez jositako erakusketa gune desberdinak. Azken finean, Santiagomendiko paisaiaren protagonista den belar-gune esanguratsuenetako bat suntsituko litzateke inolako beharrik gabe».
Azkenik, EH Bilduk ekimen honekin ermitaren masifikazioa eta turistifikazioa ahalbidetuko duela dio. «Egitasmo honen helburua ermitara bisitari gehiago erakartzea da eta honek astigartarrontzat zein inguruko herritarrontzat elkargune kuttuna dena, erabat desitxuratzea eragingo du. Trafiko, zarata eta elkarbizitza arazo gehiago izango direnez, argi dago kaltetu nagusiak eta zuzenak inguruko bizilagunak, baserritarrak, eta betiko erabiltzaileak izango direla».
«Honegatik guztiagatik, EH Bilduk ekimen hau jasotzen duen Planaren aurka botoa eman zuen eta jarrera hori mantenduko du, gutxienez, planteamendu hau Planetik kendu arte».
Santiagomendiko Paisai Plana zifretan
«Gaur-gaurkoz Santiagomendiko herritarrak ezta astigartarrek orokorrean, ez dute inolako onurarik jaso. Diru publikoa xahutzeko baliagarri besterik ez da izan. Dagoeneko 78.000 euro baino gehiago gastatu dira: «60.000 euro inguru dokumentu desberdinak idazteko, 16.000 euro komunikazio ekimenetarako eta 2.000 euro bidai gastuak ordaintzeko. Herritarrengan izan duen eragin eskasa eta Santiagomendin dauden behar nabariak ikusita», EH Bilduk uste du dirutza bideratu dela egitasmo honetara.
EH Bilduren ustez, «EAJk ingurumenarekiko duen jarrera zuritzeko erabili du gai hau baina azkenean, ekimen interesgarria izan zitekeena, diru publikoa xahutzera eta ermita turistifikatzera kondenatzeko arriskua» salatu du EH Bilduk.