AStigarragako astearteko Plenoan hainbat erabaki hartu ziren eta horien artean, besteak beste, korporazioak adostuko ditu kultur etxe berriarentzako izenak eta gero herritarrek aukera izango dute horien artean bat aukeratzeko. Orain arte Murgiazpi zen Udal Gobernuak hobesten zuena, baina EH Bilduk ez zuen egoki ikusten izen hori eta herritarrek erabakitzea, emango zaizkien aukeren artean, adostu da. 2020an uztailaren 27a herriko jai izendatzea ere erabaki zen, Santio eguna, larunbata izango baita.
Hala ere, egon ziren adostasun osoa eduki ez zuten gaiak. Kiroldegiko tasen aldaketa Udal Gobernuaren babesarekin eta EH Bilduren abstentzioarekin onartu zen. Baita, udalerrian hots kutsaduraren aurka babesteko udal ordenantzaren aldaketa. «Parte hartze gehiago bermatu behar zen» adierazi zuen EH Bilduko bozeramaile den Andoni Gartziak.
Emaitza berdina eduki zuen, sei aldeko boto eta bost abstentzio, 3,3 milioi euroko kreditu aldaketari lehenengo onarpenak. Bosgarren puntuan ere kreditu gehigarri baten aldaketa onartu zen, azken hau dekretuz.
2018ko aurrekontuaren likidazioa
Andoni Gartziak Udal Gobernuak ezer gutxi egin duela esan zuen. «Astigarragan gertatzen dena ez da inon gertatzen. 871 mila euro gutxiago gastatu dira. Ez da dirurik inbertitzen, ez dira proiektuak exekutatzen, 7,3 milioi euro exekutatu ziren, pasa den urtean baino 500 mila gutxiago, eta hori aurrekoa urtea txarra izan zela. Eta datu lazgarriena inbertsioena da. Jeitsi egin da zenbaki absolutuetan eta portzentaian. 9 milioi euroko gerakina (remanentea) dago Udalean, non ikusi da hori EAEn? Inon ez».
Zorione Etxezarraga alkatearen esanetan. «Herria ez dago geldirik. Proiektu haundi bat egin ordez nahiago dugu desberdinetara banatu. Esparru gehienetara iristeko proiektuetan banatu ditugu inbertsioak. Jendeak ikusten ditu inbertsioak. Hobetzeko marjena badago» .