Donostiako Udalaren eskaerari erantzunez, EAJk eta PSE-EEk gidatzen duten Gipuzkoako Foru Aldundiak abian jarri du Martuteneko poligonoa eta Astigarraga lotuko dituen errepidearen proiektua. Errepide honek Martuteneko poligonoa eta Astigarragatik Perurenara doan errepidea lotuko ditu Petritegi parean. Honen eraginez, poligonora joateko errepide hau erabili nahiko duten guztiak herri sarrerako (Portutxoko) biribilgune nagusitik pasa beharko dute. Aldundiak zifra jarri dio: gaur egun baino 5.018 auto eta kamioi gehiago pasako dira egunero biribilgunetik.
EH Bilduk «argi du Martuteneko poligonoan trafiko arazoak egon badaudela eta poligonoko sarreran auto pilaketak nabarmenak izan ohi direla. Baina Astigarragako EH Bilduren ustez arazoaren konponbidea ezin da izan Astigarragako sarrera/irteera nagusian beste arazo bat sortuz».
«Hau ekiditeko, eta gutxienez astigartarroi, batik bat Portutxoko bizilagunei eta Bidebitarteko erabiltzaileei eragingo dien kalteak murrizteko helburuarekin», EH Bilduk sei alegazio aurkeztu dizkio proiektuari. Batetik mugikortasun azterketarik egin ez izana salatu du. «Errepidea inolako diagnosia teknikorik gabe bideratu da. Ez dira aztertu Martuteneko poligonoak sortzen dituen joan etorriak nolakoak diren: nondik datozen, nora doazen ezta Astigarragan 5.018 auto eta kamioien joan etorriak izango duen eragina (zarata, kutsadura, egun dauden auto pilaketen normalizazioa) eta eragin hori murriztu edo ekiditeko har daitezkeen neurriak».
«Lehentasun osoa autoei»
Bestetik, «errepidea autoentzako soilik diseinatu izana» ere salatu du EH Bilduk. EH Bilduk «ezin du sinetsi honelako inbertsio puska bat egitea proposatzen denean, bidegorririk eta oinezkoen biderik ez aurreikusi izana. Mugikortasun jasangarria guztion ahoetan dagoenean, EAJk poligonora modu errazean bizikletaz eta oinez joateko aukera ahaztu eta beste behin ere lehentasun osoa autoei eman die. EAJren estrategia argia da: mugikortasun jasangarria eta garraio publikoa ahotan izan bai, baina ekintzetan, autoari erabateko protagonismoa ematen jarraitzea. Bidegorririk ez eta autobusetan murrizketak: hauek EAJren mugikortasu politikaren oinarri Astigarragan».
«Donostiako Udalaren interesetara makurtu»
Alderdi abertzaleak dio «EH Bildu astigartarren interesak babesten saiatu den bitartean, EAJren Astigarragako Udala ezer egin gabe geratu da eta Gipuzkoako Foru Aldundiari eta Donostiako Udalari ateak zabalik utzi dizkie nahi dutena egin eta desegiteko. Astigarragako EH Bilduk Alkateari enegarrenez dei egiten dio Gipuzkoako eta Donostiako interesetara makurtu beharrean, Astigarragaren interesen babesle izatera».