lantoki bihurtu dute Aranoko udaletxeko ganbara pasa den urriaren 1etik aurrera, eta aste batzuk pasata, datorren ostiralean, hilaren 25ean inauguratuko dute.
Arratsaldeko 19:00etatik aurrera izanen da ekitaldia, eta espazioa bisitatzeko aukera izateaz gain, Ane Iturbe eta Xabier Arratibelek eskainiko duten kontzertu akustikoarekin gozatzeko aukera ere izanen da.
Bertaratzeko gonbitea luzatu die Aranoko Udalak herritarrei: «Aranoko udalak eta bertako partaideek ilusio eta gogo haundiz ongietorriko zaituzte bertan», jakinarazi dute.
Zortzi lagunentzat lekua
Kontzejua eta udal bulegoen gaineko aretoa da, hain zuzen, lantoki bihurtu dutena. Bertan zortzi lagunentzat dago lekua, eta herrian etxetik lan egiten duten pertsonentzako espazio partekatua da, esparru ezberdinetan jarduten diren profesionalek jarduera ekonomikoa gune amankomunean burutzeko.
Asmoa da horien artean «sinergiak sortu eta herriari begira dauden proiektuak sortzea sustatzea», azaldu dute Udaletik. «Landa eremuko bizimodua aldatu egin da eta udal zerbitzu honek garai berrietara egokitzea bilatzen du».
Horretarako, bakoitzak lan-mahai bat izanen du, baita internet konexioa, argindarra eta berogailua eta komuna ere. Horren truke, prezio itxi bat ordaindu beharko dute erabiltzaileek. Espazioa irekia izanen da, eta parte hartzeko Udalarekin jarri beharko da harremanetan.
Alaiondo estudioko kideak, aurrenekoak
Ganbaran kokatu diren aurreneko kideak Alaiondo estudioko gazteak izan dira. Dagoeneko hiru urte dira Aranora lanera eta bizitzera joan zirenetik. Eta ordutik hainbat lan egin dituzte herriarentzat.