Langile Ikastolako gurasoek deituta ehundaka ikasle eta guraso elkartu ziren Hernaniko Plazan, ostiralean ikastolako jangelan janariarekin gertatutakoa salatzeko. Kazerolada izan zen eta Uxue Apaolazak eta Gaizka Izagirrek, gurasoen izenean, irakurri zuten mezua sei puntutan.
«Ostiral honetan mezu bat iritsi zen Eusko Jaurlaritzatik gure ikastolako jangelara, lehen platera, babarrunak, ez zerbitzatzeko abisuarekin. Ez zuen denborarik eman begiraleek janari kaltetua jan ez zezaten. Horrez gain, zentroetako bateko haur batek har bat aurkitu zuen bere platerean».
1. Onartezina deritzogu. Gure seme-alaben, eta haiek zaintzen dituztenen elikadura ez da jolasa.
2. Gertatutakoa eredu oso baten isla eta ondorio da. Gure haurren elikagaiak makroenpresen esku daude. Eredu hori inposatua da, hezkuntza komunitateari ez zaio ahotsik onartzen ere. Irabazi ekonomikoak lehenesten dituztenen esku utzi da gure haurren elikadura. Zein prezio jarri diote gure haurren osasunari? Zenbat diru aurreztu nahi da, Basque Culynari Centerren gastatu ahal izateko?
3. Askorentzat, jangela zerbitzua aukera bakarra da. Ez da hautazkoa, ez da pribilejioa.Eguneko janari bakarra izan ohi da askorentzat. Eta kalitatezkoa eta osasungarria izan behar du. Sinatu den kontratua bertan behera utz ezazue, berandu gabe.
4. Langile ikastolak, EAEko gobernuak baino lehenagotik funtzionatzen duenak, gure haurren elikagaiei buruzko eredu propio bat landu nahi du, Eusko Jaurlaritzaren zailtasun eta trabarik gabe. Utzi iezaguzue erabakitzen, utzi iezaguzue egiten. Gertuko produktuak gertu prestatu nahi ditugu. Kontratua lortu duen enpresak ehunka kilometrora ekoizten eta kozinatzen ditu jakiak. Ez al dugu ba karbono aztarna gutxitu nahi?
5. Langileekin gaude, lanpostu feminizatu eta prekarizatuak. Gure haurren hezkuntzaren atal oso garrantzitsu bat lantzen dute. Eskerrak eman nahi dizkiegu. Babesa adierazi nahi diegu gertaerarekin eduki duten profesionaltasuna eta erantzun azkarra txalotu nahi ditugu.
6. Bihar guk bermatuko dugu haur guztientzako janari duin eta osasungarria izango dela. Ez dugu Serunioneko janaririk jango. Seriunioni ozen esan nahi diogu, ez itzazue zuen urrutiko kamioiak bihar ekarri.